uMthunywa
YiNtatheli kaMthunywa
ILIZWE leCongo Brazaville liqembu elaziwa liqinile kumdlalo webhola lenyawo e-Africa.
Ukudibana kwalo lesizwe seZimbabwe ngeSonto kuphosele umqeqetshi wamaWarriors umthwalo onzima ngoba kumele anqobe ukuze kubelula ukuthi aphumelele ukuya kuhlandla elilandelayo.
Umdlalo lo uphendla umncintiswano omkhulu owe-Afcon ozaqhutshelwa eCameroon ngo2019.
Lomsekeli kamongemeli weZimbabwe Football Association uOmega Sibanda usekhuthaze isizwe ukuthi sisekele amaWarriors ngenxa yokuthi umdlalo wangeSonto lo ubaluleke kakhulu.
Ekhuluma lephephandaba likazulu, uSibanda uthe abalandeli behlabelele phezulu ingoma zokukhuthaza iqembu.
“Ngumdlalo oqakathekileyo lo. Ngikhuthaza bonke abalandeli benguqu ukuthi babukele lumdlalo kumabonakude mhlaka 9 Mpandula. Kumele sihlabele iculo lokukhuza abafana loba bedlalela khatshana.
“Singasoli lutho. ICongo Brazzaville kumele inqotshwe ekhaya layo ukuze sifinyelele eCameroon. Sizafika kuphela,” nguSibanda lo.
Kuhambo lwabo lokufinyelela ku-Afcon ezayo, amaWarriors anqoba iLiberia 3-0 enkundleni yeNational Sports Stadium. Lokhu kwenza kwabalula ukuthi iZimbabwe ikhokhele ingalane ngebhola elilodwa phezulu kwenkunzi ezifana leDemocratic Republic of Congo.
IDRC yanqoba iCongo Brazaville nge 3-1 kumdlalo wazo wakuqala kuqula lika-G.
Umdlalo wama-Warriors kubikwa uzakhitshwa kumabonakude ngehola lesithathu emini njalo lumdlalo uzabe usenkundleni ye-Alphonse Massamba Debat.
Onozinti balumdlalo nguVictor Miguel de Freitas, Zakhele Thusi Siwela loJohannes Sello Moshidi abavela eSouth Africa.
Umqeqetshi wamaWarriors uSunday Chidzambwa ubikele intatheli ebulenjini ukuba kuzakuba nzima kuye ukuphenduka ekhaya nxa edliwe.
