uMthunywa
YiNtatheli kaMthunywa
AKUSOKE kwaba lenkezo yenguqu ezaphakamisa izikolo ukwedlula eyeCopa Coca-Cola, kutsho uArthur Maphosa umsekeli wenhlanganiso yeNational Association of Secondary Heads (Nash).
UMaphosa uncome kakhulu ukuzimisela kwenkampani yeCoca-Cola ngokukhipha imali yokuxhasa ithalenta labantwana abaleminyaka yokuzalwa engaphansi kwe-15.
Inhlangangiso yeNash lenkampani yeCopa Coca-Cola sezileminyaka engamatshumi amathathu ziqoqa umncintiswano lo.
Kulumncintiswano sekuhwatshwe ingcitshi ezibalisa uPeter Ndlovu owabangumdlali wakuqala ophuma eAfrica ukudlala kuligi yeNgilandi.
Kulimpelaviki ziyasukelana kuzo zonke izabelo kuqala imidlalo yokudinga intshantshu ezizancintisa kumidlalo yokucina.
Imidlalo ye-final izaqhutshelwa edolobheni leZvishavane kusukela mhlaka 12 kusiya mhlaka 14.
Ekhuluma loMthunywa kuliviki uMaphosa uthe izikolo zonke kumele zibonge inkampani yeCoca-Cola.
“Silokuthaba okwedlulisileyo ukuba sesifikise iminyaka engamatshumi amathathu inhlanganiso yeNash isebenza lenkezo yeCopa Coca-Cola. Kuhle esesikwenzile njalo silethemba lokuthi sizaqhubeka sixhasa ithalenta labantwabethu.
“Esikubabaza kakhulu yikuthi iCopa Coca-Cola isitshiye imbali enhle kuzo zonke izikolo. Kulezikolo esezithole izibholane, amanzi, amagetsi lezakhiwo ngenxa yenkezo le,” kutsho uMaphosa ophinda abengumphathisikolo weGwanda High.
Kusenjalo, azahamba ehlomile amaqembu ezikolo zesabelo seMatabeleland North esiya eBinga laseManjolo High ehlose ukuyancintisa kumqhudelwano omkhulu kumdlalo wenguqu yezikolo kuleli owenkezo yeCopa Coca-Cola kusukela ngoLwesihlanu.
Izikolo ezizancintisa zibalisa iChiba leKariyangwe ezeBinga, Majiji, Somvubu (Bubi), Hwange Government, Makwala (Hwange), Vulindlela, Mabhikwa (Lupane), Simbo (Nkayi), Madlelenyoni, St James (Umguza), Binga High, leTohwe.
Kwezinye izabelo, koBulawayo izahlanganisa izikolo eGifford High. EzeMat South zivula inkundla eColleen Bawn. Masvingo (Pamushana High), Mashonaland central (Rujeko High), Mashonaland East (St Francis, Madzivire), Manicaland (Mamunyadza), Midlands (Zvishavane).
UMaphosa ubike ukuba umncintiswano walonyaka uzakuba nzima.
“Ngendlela okuqhutshwe ngayo amalungiselelo emidlalo yama-final alonyaka eZvishavane, kuzafiwa kulumcintiswano.”
