uMthunywa
Arnold Ndlovu
NGENHLOSO yokulwisa indlala endaweni yeTshankwa ePlumtree uHulumende usevuselela i-irrigation scheme yakule indawo njengendlela yokuphathisa izakhamizi zakuleyondawo.
Kubikwa iqala i-irrigation scheme endaweni le, izakhamizi ezaziphatheka zazilima amahekitha angu-50 kodwa yacina isivalwa izakhamizi lezi sezigwenxwe yizikwelede zamagetsi wona ayencedisa ukupompa amanzi.
Intatheli ixhumane lesinye isakhamuzi sakule indawo, uNkosazana Martha Jubane oveze ukujabula ngokuvuselelwa kwendawo ye-irrigation.
“Siyakujabulela lokho okwenziwa nguHulumende lababambisene labo ekuvuseleleni i-irrigation le, ngoba indawo yakithi ilamadamu alamanzi amanengi sesizathola indlela yokuwasebenzisa asincedise lathi njengezakhamizi zalapha silwisane lendlala njengoba izulu lingani kuhle endaweni yakithi.
“Ngikhuluma nje ucingo solufakiwe sekuqalile ukufakwa lempompi lemitshina edingakalayo seyafika, osokusele yikuthi ixhunywe besekuqaliswa ukusebenza njengakudala.
“Endaweni le kwakulinywa izilimo ezehlukeneyo ezigoqela umumbu, amatamatisi, ihanyanisi kanye lemiqwente sithengisa njalo sithola lokudla kwezimuli zethu,” kutsho uNkszn Jubane.
Esinye njalo isakhamuzi esikhulume loMthunywa uNkosikazi Sithengisilizwe Dube siveze ukuthi abantu babeziphilisa nge-irrigation le, kodwa lokhe yavalwayo sokwaba nzima ebantwini kodwa khathesi intuthuko isikhona ku-irrigation yabo ngoba lendlela yokuthelezela siguqukile.
“Kuqala indawo le ibilusizo ebantwini bakule indawo ngoba sasizisebenzela kuhle kodwa sahlutshwa nje yindaba yamagetsi eyasiphazamisa yacina ivalwa.
“Ukuvalwa kwamagetsi kwabangela ukuthi kubenzima ebantwini besigaba ukuthi bathelele izilimo zabo ngakho zacina zisitsha abantu bahle bekela ukulima. Ukuma ukusebenza kwe-irrigation le kwasokulethe indlala ebantwini ngakho khathesi ukungenela kukaHulumende kuzancedisa abantu.
“Siyathaba njalo siyamncoma uHulumende ngokuyivuselela. Imuli zethu sezizaphepha,” kuphetha uNkkz Dube.
