uMthunywa
Cornelius Luphahla
BAZONDE bagane unwabu abazali abalabantwana abafunda esikolo seMbungu Secondary esigabeni senduna uManoti eGokwe ngemva kokuvela kwembiko yokuba kulenyanga eyakhele bucwadlana lesikolo lesi esithwalise nzima abafundi ngokubahlukuluza emacansini ngomubobobo nxa besesikolo.
Inyanga le okuvele ukuba nguMnumzana Clayton Gwasarira kubikwa isilesikhathi eside ihlukuluza abafundi isebenzisa umuthi lo.
UMthunywa uzwe ukuthi uMnu Gwasarira welaphela eduzane lesikolo lesi kuthi nxa abafundi bedlula lapho asebenzise umubobobo ukuthi abahlukuluze.
Intatheli ixhumane loNkosazana Liznet Moyo oyisakhamuzi sakule indawo walandisa ngendaba le ethi imzwisa ubuhlungu ngoba inyanga le ibulalela abantwana ikusasa labo.
“Mina indaba le ngaqalisa ukuyizwa kudala sibili kodwa ngangingakukholwa lokhu. Okwangimangalisayo yikuthi ngezwa abazali abanengi sebekhuluma ngakho bethi bakuzwa ngabantwababo. Ngemva kwalokho sayabikela ababalisi esikolo kodwa labo behluleka ukuthi bambuze njani.
“Noma kunjalo thina njengezakhamizi sabona kungcono ukuthi simsuse uGwasarira samtshela ukuthi adinge enye indawo yokwelaphela wasesuka. Noma kunjalo mina indaba le ingizwisa ubuhlungu kakhulu ngoba ubulala ikusasa labantwana. Isifiso sami yikuthi ngabe kuyavuma uGwasarira abotshwe ngoba kasoze awekele umkhuba wakhe lo,” kulandisa uNkszn Moyo.
Ekhuluma lentatheli omunye wezakhamizi zakule indawo oziveze ngokuthi nguDube uthe basazama amacebo okubuza inyanga le mayelana lalesisenzo sayo ukuze ixotshwe esigabeni.
“Njengezakhamizi sisabopha iqhinga lokubuza uGwasarira mayelana lendaba yakhe yomubobobo ngoba imbi kakhulu. Ngemva kwalokho angavuma sizamxotsha esigabeni ngoba ugangile sibili njalo angacina esegangela umuntu wonke esigabeni.
“Okunye njalo izakhamizi ziyamesaba ngoba yinyanga njalo banengi abantu abafa ngemva kokuxabana laye yikho nje sidinga indlela eqotho yokukhulumisana laye,” kutsho uMnu Dube.
Imizamo yokukhulumisana loMnu Gwasarira yehlule ngoba kala makhalekhukhwini.
