uMthunywa
SIYAQHUBEKA ngokunanzelela abalingiswa bethu, sesikhangela labo abangekho mqoka njalo kuyibo abaqhuba ugwalo njalo begcwalisa indikimba ezikhona egwalweni.
UMaikele: Lo kwakungumngane kaBubbles ngesikhathi eselahle uKhotso wakhe. Wayengathembekanga simbona eyenga uBubbles ukuthi antshontshe, kalandlela yokumakha ngitsho kumbe ukumkhuza nje lokhu. Yena mdabuko wakhe wayelisela entshontshela abantu impahla zabo esiyazithengisa.
Ngumuntu owayephila ngokudlala amakhasi loBubbles kanye lomngane wabo uFreddy, ngumuntu owayegcwele ubuqili impilo yakhe yonke.
Umfundisi uBhebhe: Ulothando kakhathali ngelokuthi UNgonyama wacina kudala ukubuya esontweni, uyamamukela ngezandla zombili amlalele lalapho ekhala.
Kamlahli kodwa umxwayisa ngokusegcekeni njalo kuliqiniso lempilo, ulezixwayiso ezakhayo ezinhle, kadilizi imizi yabantu loba nje ebona ukuthi iphutha lingaphi uyakha. Ulomusa, uzinikela ukulala uNgonyama. Uzinika isikhathi emlalela engakhathaleli okwenzuzo.
Ulothando njalo ugxile kunkolo yakhe, simbona ngemva kwengxoxo yakhe loNgonyama uzinika isikhathi sokukhuleka ndawonye loNgonyama ngendlela yokuqinisa lokumnika ithemba kunhlupho abhekane lazo.
ULusinga: Uthanda indaba, simbona enguye olandisela uNgonyama ngendaba zonke ezazisenzakala esiphundu sikaNgonyama, zonke ezazisenzakala elizweni zazisaziwa nguye.
Uthanda ukudla, simbona lapho evakatshele uNgonyama emfica esidla ahle atshayele esikhewini ukudla konke kukaNgonyama.
Uyakhuluma kakhulu, ukhuluma loNgonyama aze adakeke. Utshiyene lamanye amadoda, uthanda ukunyeya njengabafazi.
USista Zwelo: Ngumuntu olothando, uthanda uBubbles ngesikhathi esesibhedlela engamazi lokumazi ukuthi uvela ngaphi komhlaba. Ulozwelo simnanzelela ngokuzwela uBubbles emnika indawo yokuhlala ngesikhathi ephakathi kohlupho.
UKhethiwe Madlela: Ngumuntu olezixwayiso ezakhayo, uxwayisa uMaMsie ngoJoza emkhuza njalo ukuthi angaze achitha umuzi wakhe ngomuntu ongasoze amuse ndawo.
Uthule kazithandi kangako indaba, uzazi zonke ezikaMaMsie kodwa kathandi ukuziveza, utshiyana lazo njengoba zivele zingaqondananga laye. Usebenza ngokuzikhandla okukhulu, kalasikhathi sokuphumula, uyazazi isimo sakhe ukuthi akula muntu angayama kuye.
Ulothando yikho nje exwayisa uMaMsie, aluba wayengelathando wayezamyekela ewela edakeni. Uthembakele kazazisi ngitsho indubo zakhe, uziveza njengoba zinjalo kazenzisi okuyikho okumenza aphile ngendlela yokuziqhwayela.
Simbona njalo ebikela uMaMsie zonke indubeko zakhe, engatshengisi ngitsho lomhawu ukuthi uMaMsie wayehlezi butofo tofo.
