uMthunywa
Kuloba uCornelius Luphahla
INKOMO zamalobolo ziyimihlobo etshiyeneyo njalo minengi imikhuba ephathelane lazo kusiya ngokuthi labo bantu abazamukelayo bayiyiphi imihlobo. Inkomo lezi zilemikhuba yazo njalo zazibizwe ngokwehlukeneyo.
Ekadeni khona inkomo zamalobolo zazingabizwa loba zibe litshumi kusiya ngokuthi abazali bentombi bavumelaneni ngesikhathi bezibiza. Ekubizeni lapha kuvame ukuthi kubize uyisemncane wentombi kumbe omunye oyisihlobo segazi kodwa hatshi uyise wentombi.
Zingabizwa zibe litshumi kuzakhitshwa-ke inkomo eyodwa ensikazi ezabizwa ngokuthi ngeyohlanga. Inkomo le imela uhlanga lukanina wale intombi elotsholwayo yikho phela iphiwa yena.
Loba kunjalo akuvamanga ukuthi umuntu olobolayo aqale ngokukhipha inkomo yohlanga kodwa inengi livame ukukhipha ezinye litshiye eyohlanga. Lokhu kuyingozi kakhulu ikakhulu ebantwaneni baleyo ntombi.
Inkomo le ebizwa ngokuthi ngeyohlanga ingakhitshwa loba ingaze izale kanjani uyise womntwana lo olotsholiweyo kalamandla kuyo. Yiyo-ke inkomo le okwakuthi ubaba walapha ekhaya angaze abhubhe abantwana bayo akuvunyelwa ukuthi babiwe ngelanga lombuyiso loba nje ezinye zingabiwa kungabi ndaba zalutho.
Okwenza inkomo le iphiwe unina wale intombi yikuthi uyabe ebongwa ukuthi nguye owamletha emhlabeni wamondla. Ngakho inkomo le iyisibongo esivela kumkhwenyana ebonga uninazala ngokumgcinela umkakhe aze ambone.
Inhlanyelo yenkomo yohlanga isala isaziwa ukuthi zinkomo zikanina wale intombi. Mhla unina wentombi le ebhubhile inkomo lezi zaziphiwe owesifazana lo owalotsholwa ngale eyazidabulayo kuthi kwesinye isikhathi ezinye zabelwe odadewabo.
Ngokunjalo inkomo yohlanga le iyingozi kakhulu nxa ingazange yakhitshwa ngoba kukhona okwenzakalayo emulini yalo ongayikhitshelwanga.
Kwakuthi nxa inkomo le ingasakhitshwanga unina wale intombi esebhubhile abazukulu bakhona abangamantombazana akuvamanga ukuthi bahlale emendweni.
Lokhu kwenzakala ngoba kukholelwa ukuthi ugogo walaba bantwana uyabe engajabulanga ngoba engatholanga inkomo yakhe okudala ukuthi abaphansi babone angani kababananzi.
Yikho phela okudala ukuthi abazukulu abangamantombazana bacine sebephuma bayekuzwa ngemendo yabo uzwe sokuthiwa ugogo wabo ozala unina ukhala ngenkomo yohlanga.
Kwakuthi kungaba njalo nxa kuyikuthi uyise walababantwwana asebehlutshwa yikwenda sowabhubha kwakuthi abanewabo bakhiphe inkomo bayise komalumabo kubikwe ukuthi ngeyohlanga. Nxa ekhona uyayikhipha yena ayihambise abanewabo bomkakhe bazabika ukuthi ngeyohlanga.
Inkomo le nxa kuyikuthi ugogo lo okwakufanele ayiphiwe sowabhubha wabekwa komunye umuntu kwakube nguye oyiphiwayo.
Engayiphiwa inkomo le kuzakuthi ingazala ithole layo elisikazi liphiwe unina walababantwana abahlutshwa ngumendo.
Ngemva kokwenza lokhu umkhuba lo uzabe usuqhutshwe kwaphela ngoba abamukela inkomo lezi bazabe bepheke utshwala babikela abadala ukuthi inkomo yohlanga isibuyile. Zizavuleka-ke indlela ebantwaneni bathathwe bakhe imizi yabo kube kuhle kube njeya.
Loba nje sokwenziwe lokhu abantwana laba asebethethwe kufanele ukuthi balotsholwe kuphume inkomo yohlanga. Nxa kuyikuthi inkomo zamalobolo kazeneli abakhaliphileyo bahle bakhombe eyinye yalezo abazikhiphayo ibe ngeyohlanga.
Nxa inkomo le isiphumile loba ezinye kungehlula ukuthi ziphume zonke kwakube ngcono kulokuthi eyohlanga ihlale ingaphumanga. Kwakunjalo endulo bakwethu, yikho abantwana babesenda bagcine imendo yabo. Kwakungavamanga ukuthi bachithekelwe yimizi ngoba imikhuba yazisalandelelwa.
*** *** *** ***
Siyabonga mlobi umsebenzi wakho wokusifundisa ngemikhuba kanye lamasiko akithi ngakho qhubeka usifundisa ungadeli. Isicelo sami yikuthi ungivezele ukuthi ngingenza kanjani ukuze umuzi wami uqine ngoba umkami uthi kangimsuthisi endlini njalo lami ngiyakubona lokhu. — Jabulani Mkhwananzi, Gwanda.
Mlobi ngithemba uphilile. Ngicela ungichazele ukuthi ngingelapha njani umntanami ngoba ulomkhuhlane wofuba kodwa usasemncane ngakho usephila nge-spray. Siza mlobi. — Beauty Mathe, Kheswa, Lupane.
Ngithemba uphilile mlobi. Mina ngihlala lomamazala ekhaya, umkami eseGoli.Uhlupho lwami yikuthi umamazala sokukanengi ngiphaphama ngimbona esendlini yami ebusuku, angazi ukuthi uyabe edingani. Isicelo sami yikuthi ungichazele ukuthi ngenze njani ngoba kangikwazi ukuthi uyabe engene njani njengoba ngiyabe ngikhiyile. — Lubelihle Mabhena, Ntabazinduna.
Ungaxhumana lomlobi ku 0775722298 kumbe ku whatsapp 0737771317.
