uMthunywa
Kuloba uCornelius Luphahla
NOMA nje abadala babethi okukhulu akulamkhosi kodwa nje liyakholakala elithi inkunzi emnyama iyona amathole. Kambe ingekela kanjani ukukwenza lokhu njengoba nje amathole la azabe ephuma ekhalweni lwayo?
Angithi abadala babengasomi mhla bethi uthango luyawadla amakhomane njalo inkukhu iyawanatha amaqanda ayo.
Kunjalo sibili, kakho ongakwaziyo lokhu ukuthi kuyenzakala. Kukhona njalo ezinye inkukhu ezinatha amaqanda ezinye zithi zikhaliphile kodwa zazikhawule mhla zithole amawumila kumbe sezibonakele zatshiswa imilomo.
Lapha-ke Mthwakazi omuhle ondlela zimhlophe ngijonge ukuchazela uzulu ngendaba ezenzakala empilweni kodwa abanye abantu abazitshaya indiva ngoba bengazazi ukuthi ziyingozi kumbe bengakaze bazibona.
Angithi nje kukhona amantombazana ozwa kuthiwa lowana seze waguga engakendi kodwa amadoda uyawathola amane amtshiye kungakatshoni ilanga. Kunjalo sibili lokhu kuyenzakala kodwa balutshwana abathwala izikhali bayekuthi nyoka ngiluma ukuze bazwe ngendaba le.
Khona vele esikhathini esinengi indaba le yayisinde abantu baphongukudela bethi kuzazilungela nje. Lokhu kungenxa yokuthi indaba le iyabe idalwe ngumatholwane esikhathini esinengi kungakhathalekile ukuthi ngowekhaya kumbe ngowakweyinye indawo.
Nanzelela ukuthi esikhathini esinengi umuzi olabazali abalomatholwane akuvamanga ukuthi amantombazana akhona ende. Lokhu kudalwa yikuthi ayabe elala lezinanakazana lezi okuyikho okudala uhlupho lolu.
Phela umatholwane lo udala ukuthi intombi nxa ihamba emphakathini noma nje ibumbekile ngokwesimo kanye lesimilo kodwa amajaha angaze ayikhwabitha. Noma nje ayabe ekhona amalutshwana ayihahabelayo kodwa uthando lwakhona kalwaze lwaya ndawo ngoba umatholwane uyabe eyingcolisile intombi le.
Khona nxa intombi ilala lomatholwane yayikuzwe ngokuthi iyabe iphupha ilele lowesilisa esikhathini esinengi kwesinye isikhathi ithi nxa ivuka ithole isijuluka umhluzi wemvelo. Lokhu kwakwenzeke kwabanye kodwa nje akuvamanga ukuthi kubonakale sobala. Okunye njalo okwakuveze ukuthi intombi ilala lomatholwane yikuthi lemizwa yayo iba khatshana njengoba nje umzimba uzabe usujwayele isinanakazana lesi.
Ngalokhu-ke lamadoda ayabe engayikhwabithi intombi ngoba isithelo sayo siyabe sesizindenda zodwa singaselakho ukukhudumala. Intombi enjalo ingaze ithathe ziphunzi bani kayaze yalunga ngoba lesinanakazana sizabe siyihlezi emahlombe.
Amanye amantombazana aze aphethe ngokuba labantwana abalaboyise abatshiyeneyo ngoba iyabe ingekho indoda emjabulelayo, wonke amadoda ayabe emlanda ngenhloso yokuziphumuza nje ebuhlungwini bosane lwemvelo.
Ungalibali phela ukuthi lasemajaheni kuyenzakala ukuthi ijaha balilalise lesinanakazana. Lakho-ke kunjalo ijaha lakhona kalaze lathola intombi eqotho ngoba wonke amantombazana ayabe engalikhwabithi njalo intombi yakhona kayaze yajabula yajula nxa ithe yahlangana lejaha elinjalo imana izwe angani ijaha leli liyalenwaya nje.
Kwesinye isikhathi ijaha elinjalo limana laliwe ngamantombazana wonke njalo liyabe lingelaso isifiso esikhulu sokuba lentombi. Ijaha leli kwesinye isikhathi liyabe lithi nxa libona intombi lizwe lidinwa nje lingafuni ngitsho lokukhuluma layo.
Kunjalo-ke mahlabezulu ngakho intombi kumbe ijaha elinjalo lalisile ngemva kokuba abazali balo kumbe lona lithwale izembe layakuthi nyoka ngiluma. Nxa lithe lathola umuntu okwaziyo akwaze kwaba yinto enzima lokhu ngoba uzamana alilumeke, athiye umzimba walo wonke abuye aligezise kuphume ingcekeza yonke le edala isidina emzimbeni walo njalo akwaze kwaphinda kwenzakala lokhu nxa kusebenzekile.
Khona kuvame ukuthi nxa umuntu osebenze ijaha kumbe intombi le ekwazi ukusebenza omatholwane laba abayabe belala lomuntu lo omsebenzileyo babuyele kumnikazi bayemtshaya kumbe bayelala laye labantwabakhe.
Kunjalo bakaMalandela ngalokhu kuqakathekile ukuthi sinakekele imuli zethu njalo sinanzelele ezinye izenzo esizenzayo ngoba zibulalela abantwana ikusasa labo. Ngalokhu kuhle ukunanzelela ezinye izenzo ezenzakala emulini zethu kusasemasinya ukuze zingadali ingozi.
*** *** ***
Ngithemba uqinile mlobi. Mina ngiyabonga ngendlela ochaze ngayo ngokuphehlelwa isithundu njalo ngifunde okunengi, ngalokhu ngithi qhubekela phambili usembula inkungu kuMthwakazi. — Tshabangu kaNgwane, Bulawayo.
Mlobi sithi qhubeka ukhuthaza ngezamasiko ngoba zivuselela ubuzwe bethu. Mina okwami yikuncoma umsebenzi owenzayo ngikhuthaza lentsha ukuthi iwuthakazelele ngoba uveza ubuyithi bethu. — Mlindeli Mkhwananzi, Tsholotsho.
Siyabonga mlobi umsebenzi wakho osenzela wona owokusiphakamisa kwezamasiko ngakho sithi qhubekela phambili usincindisa indaba ezimnandi njengentsha engazi lutho. Okunye njalo ngithi ngabe uzulu uyakucela endaweni ezehlukeneyo uhambe usakaza ngezamasiko. —Thembelihle Mhlanga, Lupane.
Siyabonga umsebenzi osenzela wona ngakho sithi qhubekela phambili uyibambe esidukwini ukuze amasiko ethu avuke. Mina ngicela ukhuthaze kakhulu intsha ngezamasiko ukuze ihlale ilolwazi olujulileyo. — Mengezi Hlabangani, Ntepe, Gwanda.
Mlobi umsebenzi wakho osenzela wona uyancomeka kabanzi ngoba uthuthukisa ezamasiko ngakho ngithi qhubekela phambili ngomsebenzi lo ngoba uyasithuthukisa kwezamasiko. Ngalokhu ngithanda ukwazi ngokukhuliswa komntwana kusukisela esasemncane aze ayekhula. Ngingajabula nxa ungangichazela ngalokhu. — Methuseli Zikhali, Ntabazinduna.
Ungaxhumana lomlobi ku 0775722298 kumbe ku Whatsapp 0737771317.
