uMthunywa
Kuloba uCornelius Luphahla
KUSADLIWA ngoludala endulo yayingekho indoda eyayiphongukuhamba nje ingelantebe yokuziqinisa ekhalweni kumbe endukwini. Lokhu kwakungamangalisi njalo kwakuyikuphila kwamadoda wonke.
Angithi nje ngalezonsuku kwakungavamanga ukuthi uzwe kuthiwa kulendoda ephongukuwa emphakathini kungabindabazalutho. Kulezinsuku akumangalisi phela ukuthola inkalakatha yendoda kuthiwa iwile emphakathini kwahle kwaba yikuhamba kwayo.
Intebe le eyokuziqinisa endulo angithi nje wawuyiphiwa yinyanga kumbe ikhehla elidala elazi ngeziphunzi.
Ngokunjalo yonke intebe yayisiba lemikhuba yayo okwakufanele ukuthi lo oyiphiweyo ayenze ukuze ahlale eqinile.
Kwakuthi ungavela uyekele ukuqhuba kuhle imikhuba yentebe le ihle ibhuluke. Ngokunjalo labo ababelentebe lezi babeyilandela imithetho yazo ukuze kusasa kungaze konakala.
Khona phela imikhuba le kwakuthi nxa uyilandela uyibone impumela yayo ngoba kwakungeke kwaba lobubi lapho.
Zikhona njalo intebe ezazisebenza ukuthi indoda nxa isemphakathini sokuzavela into embi izwe kusithi isuke lapho ihambe. Ekuhambeni kwayo izathi ingakayindawo kusale kusenzakala inkemenkeme yendaba kulimale abantu kube luthuli.
Kukhona njalo ezinye intebe ezokuthi indoda mihla yonke ihlale isehlelwa yinhlanhla engaba yikuthola imali, ukukhethwa esikhundleni eziphezulu kumbe okunye okuhle nje empilweni. Zazikhona njalo intebe zokuthi indoda yakhona ithi ingakutshaya noma ngempama uhle uwele phansi uqaleke. Indoda enjalo yayikujabulela lokhu ngoba ingasoze idelelwe muntu empilweni yayo.
Angithi nje kulezinsuku umuntu kungathiwa ulentebe abantu bahle bagijimele ukuthi uyathakatha. Noma kunjalo endulo intebe yayingabizwa ngalokho njalo lakulezinsuku bakhona abalazo intebe ezingaphazamisi umphakathi.
Onguye owayelungisa intebe le kwakuthi nxa kuyinyanga ingakutsheli ukuthi intebe le iyenze ngani kodwa nxa kulikhehla eliyisihlobo lalikwazisa ukuthi ilungiswe ngani ukuze kusasa uzenzele.
Kwakunjalo phela endulo ngakho intebe lezi kwakusetshenziswa izihlahla ezinengi, amafutha ezinyamazana kanye lezitho zezinye izinyamazana ezithile. Kwakukhona njalo intebe yenduku uzwe kuthiwa induku le kayibanjwa muntu.
Esikhathini esinengi umnininduku le ubehlala eyithwele noma esiya ngaphi.
Angithi khona kuvame ukuthi induku yakhona ibe ibazwe ngobande. Ubande phela yisihlahla esixotsha abakhunkuli, eselapha inkanda kanye leminye nje imikhuhlane etshiyeneyo. Induku le iyabe igcotshwe ezinye njalo izanzoco zokuyiqinisa ezigoqela indabulavalo, umthunzi wesilwane, amafutha emvubu, awenhlathu kanye lezinye iziphunzi engingeke ngazibetha ngamagama.
Labo abalentebe yokuthi umuntu angaze wawela engozini kwakuthathwa umsila wempisi, insiba zenhloni, inzipho zenkakha, uzudlwana kanye lezinye njalo izihlahla engizila ukuzichaza emphakathini. Iziphunzi lezi zizahlanganizwa zibotshelwe esikhumbeni sentini kumbe esenhloni kuphiwe indoda ukuthi iyibophele ekhalweni.
Lapho-ke kuzabe sokusebenzekile sibili njalo intebe le kuyabe kungafanelanga ukuthi iqamuke. Abanye babethi bengaphiwa intebe lezi bexwayiswe ukuthi bengaze bageza malanga wonke. Lokhu kwakungumkhuba wentebe ezinengi sibili yikho phela kwakungavamanga ukuthi indoda ihlale igeza.
Kwakunjalo endulo, yikho phela amadoda ayehlala elezithunzi ethi nxa ekhuluma emphakathini amazwi akhona ezwakale. Kulezinsuku uthola amadoda ephikisana emphakathini kungekho ovuma elomunye ngoba amazwi akhona elula engelaso isisindo seziphunzi.
Mlobi siyabonga umsebenzi lo osenzela wona ngakho ngithi qhubekela phambili ukhuthaza uzulu ngezamasiko ukuze uphakamise uzulu. Isicelo sami yikuthi ungichazele ukuba ngingenza kanjani ngoba ihloka lami kalisagamuli kuhle sengileminyaka emibili ngilaloluhlupho. — Bongani Mpofu, Nkayi.
Siyabonga umsebenzi osenzela wona owokusilobela ngezendulo, ngilethemba lokuthi abantu bathola usizo kulokhu njengami. Isicelo sami yikuthi ungichazele ngokwenziwa kwembiza. — Nkosinathi Ndlovu, Esigodini.
Mlobi sithi qhubekela phambili ngokusilobela ngezamasiko ngoba uphakamisa uzulu. Ngalokhu ngifisa ukuthi iNkosi ikugcine uqhubekele phambili ngokusisiza. Isifiso sami yikuthi ungichazele ukuthi ngingenza njani ukuze inkomo zami zande ngoba ziyafa kakhulu njalo kazizali. — Nomakhosi Ntuli, Tsholotsho.
Ungaxhumana lomlobi ku 0775722298 kumbe ku whatsapp 0737771317.
