uMthunywa
Kuloba uCornelius Luphahla
MTHWAKAZI siyadibana kunkundla yethu lapho esigiya khona ngamasiko kanye lemikhuba yethu, okuyikho okusenza siziqhenye ngobuyithi bethu. IBhayibhili lithi indoda yinhloko yomuzi. Ngalokhu kubalulakile ukuthi amadoda akwazi ukuphilisana kuhle labomkabo njengalokhu okwakusenzakala endulo okuyikho njalo okwakusenza imizi yabokhokho bethu iqine.
Endulo kwakungavamanga ukuthi uzwe kuthiwa indoda ichithekelwe ngumuzi. Khumbula ekadeni njalo obabamkhulu bethu babethatha izithembo zabafazi ababili kumbe abane kodwa lanxa kunjalo imizi yabo yayiqine saka. Lokhu kwakungenxa yokuthi amadoda akhona ayesazi ukuthi umfazi uphathwa njani njalo utshaywa ngaswazi bani.
Ungalibali ukuthi endulo amajaha ayefundiswa ngesikhathi engakathathi ukuthi kufanele aphathe njani imizi yawo. Yikho phela okwakudala ukuthi imizi yakhona iqine loba nje ubaba ezabe ephuma phandle kodwa kwakungeke kwawudiliza umuzi lokhu. Indoda yayivele isaziwa ukuthi libhetshu lomziki elivunulwa ngumuntu wonke kodwa kwakungatsho ukuthi kufanele ingaziphathi.
Qaphela ukuthi ngalesosikhathi amadoda ayekhetha ukuthatha isithembo kulokuthi abe labomasihlalisane.
Ngalokhu-ke kwakungavamanga ukuthi uzwe kuthiwa ihlaselwe zinyosi kumbe ngomunye nje umkhuhlane wocansi.
Phela umuntu othetheyo kwakube kuhle ukuthi achathekele owakwakhe amazwi anambithekayo embalisele ngothando olusenhliziyweni yakhe aze akhumbule ngensuku esaseyintombi. Ukumjabulisa lokhu kwenza uthando lwalaba bobabili luhlale luvutha kuthi lamhla bethe indoda ithe yamphambanisa owakwayo amane ayixolele masinya nje.
Kulezinsuku phela akhona amadoda athi angavela emsebenzini afike adle qede angene engutsheni alale obukaBhuka kuze kuyelamula ukuphuma kwelanga engazange wangena ngitsho lasenkonzweni yekuseni.
Indoda enjalo yenza lokhu ikhohlwe lokuthi umkayo weza kuyo elandeni. Pho kuyabe kusaseyindoda bani le njalo? Angithi yikho lokhu okudala ukuthi owesifazana aphume phandle kumbe ahlale elolaka mihla yonke.
Yebo kambe kuyatholakala sibili ukuthi iqolo lendoda lingasasebenzi ngendlela eqondileyo kodwa khona kwakube kuhle ukuthi nxa selingasavumi ukhulumisane lomkakho ukuze akuncedise ukulungisa indaba le ngoba kungenzakala ukuthi kube kudalwa yikungaziphathi kuhle kwendoda okuyikho okudala ukuthi amadoda amanengi abotshwe ngomkabo. Okunye njalo akuthi nxa uyindoda usuthe wajumeka ungananzeleli ukuthi umkakho usakufuna ungamuzwa esekunyikinya uvuke akubikele isikhalazo sakhe lawe uzame njengendoda loba nje kuyabe kusala.
OMandulo babewakhuthaza phela amajaha ukuthi okuqakathekileyo ezindlini luthando kanye lokwazi ukusebenzisa induku yensitha ngohlonzi oluphezulu. Kukhona amanye amadoda aphuma phandle kungelasizatho. Amadoda anjalo yiwo avame ukubotshwa ngabesifazana ngoba ayabe engayibekanga insolo
kodwa emane aphuma nje kungelasizatho ngapho lemvundiso yakhe isehluleka ukujabulisa owakwakhe.
Nxa uyindoda usazi ukuthi kawenelisi ukuphatha imizi emibili kungcono ukwekela ngoba umkakho uzakunanzelela usufika udiniwe nsukuzonke. Yikho-ke ukuzithengisa okwenziwa ngabesilisa abanengi bakhathesi okudala ukuthi imizi eminengi ichitheke. Phela kuqakathekile ukuthi amadoda abekwazi ukuthi omkabo kabafani labomabonakude bekamelweni abasebenza ukubukwa kuphela zwi.
Endulo ijaha lalifundiswa ukuthi emdlalweni akujahwa njalo kufanele izulu line amahlandla aze abe mathathu kowesintwana ngalesisikhathi. Yikho phela okwakudala ukuthi indoda ingaze ithathe isithembo umkayo omdala angabi lendaba. Kulezinsuku okunye okudala ukuthi imizi ichitheke yikuthi indoda iyabe ivele isindwa ngumuzi wayo ibuye njalo iyedinga umakhwapheni ozayisenga bakithi ifike kwayo ingasela ngitsho lamhluzana.
Mthwakazi kaNdaba, kwakube kuhle ukuthi indoda ibone ukuthi ingaze yekethise kwenye indawo kodwa endabeni zomdlalo wendlini ibambe ziqine sibili ngoba amajongosi angamana ayicuce kungabi ndaba zalutho.
Sengitshaye kwenela bakwethu ngakho ngilethemba lokuthi uzulu uzwile njalo uzayibamba esidukwini ikakhulu ngendaba zasendlini.
*** *** ***
Mlobi ngiyawuncoma umsebenzi wakho ngithi ungadeli ukusifundisa thina abatsha ngoba kasazi lutho ngezamasiko. Ngalokhu ngifisa ukuthi ngabe uyasivakatshela emakhaya ikakhulu ezikolweni ukuze intsha yonke ithole ulwazi olujulileyo ngamasiko. — Sindisani Nyathi, Singeni, Nkayi.
Ngithemba uphilile. Ngithanda ukubonga indlela oloba ngayo ulimi ngithi qhubeka ufundisa uzulu ngolimi lwesiNdebele ngoba ukuloba kwakho yikho okuvuselela ulimi. — Robert Gatsheni, Sizinda.
Umsebenzi wakho owenzayo uyasijabulisa ngengoMthwakazi ngoba uveza imvelaphi yethu loba nje bebalutshwana abasabambelele kwezamasiko. Ngalokhu ngicela uchazele uzulu mayelana lokuthi inkosi yayibekwa ngubani njalo njani? — Menziwa Khumalo, Lupane.
Mina ngibonga ukuthi izifiso zami zokuthi kulotshwe ngezamasiko ajulileyo kuphephandaba likazulu sezigcwalisekile. Ngalokhu ngilethemba lokuthi uzaqhubeka ucazulula zonke indaba ezikhathaza uzulu kwezamasiko. Ungadeli. — Nqobizitha Hlabangani, Filabusi.
Ungaxhumana lomlobi ku 0775722298 kumbe ku Whatsapp 0737771317.
