uMthunywa
Arnold Ndlovu
KUZABE kungabizwa ozwayo kulimpelaviki kumkhosi weMadlela Day Concert ozadibanisa abahlabeleli abatshiyeneyo ePhelandaba Stadium, eGwanda.
Umkhosi lo uzavuthisa inkundla yePhelandaba Stadium eGwanda ngoMgqibelo, mhlaka 31 Mbimbitho kusukela ngehola lesithupha ilanga selisiya ngomtsha wendoda kuze kuyelamula ukuphuma kwelanga.
I-Madlela Day Concert le yenziwa ngemva kokunanzelela ukuthi umcimbi wakuqala wangomnyaka ophelileyo kawuzange uphumelele ngenxa yokuna kwezulu.
Kumcimbi lo kuzadibana abahlabeleli abafika 40 bemculo etshiyeneyo okugoqela abahlabeleli bengoma zika-maskandi, rhumba, house, kwaito, isicathamiya, hip-hop kanye lezokholo.
UMthunywa ukhulumisane lomqondisi kaMadlela Skhobokhobo uLubelihle Banda othe benza umcimbi lo ngoba belandela isithembiso sikaMadlela asenza ngomnyaka odluleyo lapho aveza ukuthi uzawuphinda umcimbi lo.
“Kulandela ukungaphumeleli komcimbi owawumele ubekhona nyakenye uMadlela Sikhobokhobo wathembisa ukuthi uzaqoqa enye iMadlela Day ngendlela yokubonga abantu beGwanda ngosekelo abamupha lona.
“Umkhosi lo ujonge ukubonga abalandeli bakaMadlela Skhobokhobo ngokumsekela kwabo kusukela esasungula kwezomculo kuze kube khathesi, siphinde sibonge abalandeli ngokumsekela ngomnyaka ka2017 kanye lokwethulela abantu indondo azithole emnyakeni odluleyo.
Uqhubekele phambili wathi abathanda ubunandi bebuye ngobunengi babo.
“Abathandi bomculo kababuye ePhelandaba Stadium bezothokoza ngoba kulabahlabeleli abatshiyeneyo abazabe bethokozisa uzulu,” kuchaza uBanda.
Omunye umhlabeleli ozatshaya kulo umcimbi uHwabaraty uthe abantu kabalindele ukudla kwamehlo lendlebe kuphela eGwanda.
“Abantu beGwanda kanye labathandi bomculo indawana zonke zelizwe abakufake kube ngumlandu wabo ukubakhona kulumcimbi ozabe umkhulu okwamagama.
“Mina njengomhlabeleli ngiyajabula ukuthi nginxusiwe ukuzothokozisa abantu baseGwanda ngomculo wami njalo ngithi kabamelele okutsha okuvela kimi lezinye ingoma engizazihlabela labanye abaculi bakuleli engizikhiphe lonyaka,” kuphetha uHwabaraty.
