uMthunywa
Arnold Ndlovu
BASELE bekhakhamele abazalwane belinye ibandla lesigabeni seTshelanyemba eKezi akade besemlindelweni weKhisimusi ngemva kokuba elinye ilunga lalelibandla liphume idlozi laveza ukuba seliqede abantu esigabeni lesi, uMthunywa uyakuveza lokhu lamhlanje.
Isiga lesi senzakale ngeSonto mhlaka 24 Mpalakazi lapho uNkosazana Agnes Dube afikelwe khona ngumoya lo waveza ukuthi uyaloya njalo sewaqeda abantu abanengi esigabeni.
UMthunywa ukhulumisane lamanye amalunga ayekhona mhla uNksznz Dube echaza lokhu baveza ukuthi lokhu bephethe izibindi ngezandla.
UMnumzana Majaha Sibindi uthe uNkszn Dube wabethusa kakhulu ngokuchaza abantu abafayo esigabeni ukuthi nguye owababulalayo.
“Besilomlindelo welanga lekhisimusi njalo kuleyonkonzo besikhulekelwa. UNkszn Dube ubengomunye wababesemlindelweni wasefikelwa ngamadlozi waqala ukuchaza ngobuthakathi bakhe abenza esigabeni.
“Okusimangalisileyo yindaba yokuthi ubalise abantu abanengi abafayo esigabeni wathi nguye owababulalayo,” kuchasisa uMnu Sibindi.
Uqhubekele phambili uMnu Sibindi wathi okwabethusa kakhulu yizigigaba uNkszn Dube athi uzenza ebantwaneni bakhe.
“Okunye okuvezwe nguMaDube yikuthi nguye ovimba abantwana bakhe ukuthi bende ngoba ubenza balale labondofa bakhe ebusuku. Kuliqiniso ukuthi abantwabakhe abangamantombazana abathathu sebekhulile kodwa lokhe behlala ekhaya bengendanga,” kuchaza uMnu Sibindi.
UMthunywa ukhulumisane lendodakazi kaNkszn Dube, uNkosazana Mary Dube uthe kuliqiniso ukuthi umama wabo wafikelwa ngamadlozi lokuthi izinto azikhulumayo ngabo bayazikholelwa ngoba izinto azibahambeli empilweni yabo.
“Inkulumo kamama emlindelweni isidale ukungazwanani phakathi kwemuli kanye lomama ngoba thina besingakukhangelelanga ukuthi ububi esihlangana lakho empilweni kungabe kuvelela ekhaya kumama.
“Khathesi mina labodadewethu sesasuka ekhaya sesihlala lezihlobo ngoba silindele ukuthi izinto zikamama ziqale zikhitshwe ngaphambi kokuba sibuyelei,” kuchaza uMary.
Usobhuku wakule indawo uMnumzana Mlamuli Nyoni uthe indaba le uyayazi njalo kulindelwe ukuthi ithoniswe enkundleni.
“Udaba lukaMaDube lwafika endlebeni zami sisamelele ukuthi liyothonisiswa njalo kudingwe labantu abazakhipha izinto abezisebenzisa ekuloyeni kwakhe,” kuchaza uSobhuku Nyoni.
Imizamo yokukhulumisana loMaDube yehlule.
