uMthunywa
Gladmore Ncube
INHLANGANISO yeZimbabwe Farmers Union (ZFU) ikhuthaza abalimi ukuthi balime amagwili ngoba elinywa umqando ususiyaphela.
Ekhuluma lentatheli kaMthunywa uRegional Co-ordinator weZFU esabelweni seMatabeleland South uNkosazana Brigdet Masikasi uthe abalimi kumele balime amagwili khathesi ukuze isikhathi sokutshisa sithi sifika siwathole sebambile eseqalisa ukuhluma.
“Abalimi sibakhuthaza ukuthi balime amagwili khathesi ngoba ayavuma njalo kawadli kakhulu esikhwameni ngoba awabanjwa yimikhuhlane evame ukubakhona ngesikhathi sokutshisa. Kuhle ukuthi isikhathi sokutshisa sithi sifika siwathole sebambile.
“Amagwili awavumi ukuthi ahlanyelwe nxa kutshisa ngoba awabambi kuhle njalo avame ukuthi angahlanyelwa ngalesi isikhathi abole kodwa nxa sethe ahlanyelwa kungakatshisi kakhulu ayabamba, laloba kungatshisa njani awafi, ayaphila ngoba ayabe esebambile,” kuchaza uNkszn Masikasi.
Ubuye waqhubekela phambili uNkszn Masikasi eveza izindlela okumele zilandelwe nxa abalimi befuna ukuthi amagwili abo avume kakuhle njalo abaphe inzuzo enhle.
“Abalimi kumele bahlolisise ukuthi imiqwente yamagwili abayihlanyelayo ayibolanga njalo iyabonisa ukuthi ibisihluma. Imiqwente le kumele igcinwe emagabheni ahlambulukileyo aqale ageziswa ngemithi, inhloso kuyikuthi amagwili awafuni ukugcinwa endaweni elengcekeza ngoba ayaphangisa ukuhlaselwa yizibungwana abesebola engakabambi.
“Ukuhlanzeka okufunakalayo yilokho okufanana lokwamakhowa ngakho-ke abalimi kumele babe lesiqiniseko sokuthi bayenza izinto zabo ngendlela ehlanzekileyo ngoba bengekela yibo abazacina sebesengozini yokulahlekelwa yizimali ngoba bengasatholi inzuzo akade beyikhangelele,” kuchasisa uNkszn Masikasi.
Ubuye wakhuthaza abalimi njalo uNkszn Masikasi ngezinye indlela abangazenza ukuthi balime amagwili baphinde bathole inzuzo enhle. Uthe abalimi bayenelisa ukuthi balime amagwili ngentanga hatshi ngemiqwente kuphela.
“Amagwili ayalimeka njalo ngentanga ngakho-ke nxa abalimi bethanda ukuthi bawalime ngaleyi indlela kumele bahambe ezitolo ezikhangela ngokulima bayezidinga khona. Amagwili alomkambo omkhulu kwelaseZimbabwe ngakho-ke ngikhuthaza abalimi ukuthi balime amagwili bangaze bathandabuza,” kuphetha uNkszn Masikasi.
