uMthunywa
YiNtatheli kaMthunywa
NGEMVA kweminyaka yokudlalela indlala, abadlali bebhola lokuqaga kuleli sebezathola usizo losekelo lwemali.
Kubikwa ukuba kulamankampani aseveze ukuthi afuna ukuba yingxenye yomdlalo wokuqaga. Abafakazi abaqotho bancwebe uMthunywa indlebe ukuba inhlanganiso ephethe umdlalo lo eyeZimbabwe Netball Association kungenzeka ihlale phansi lamanye amankampani kubotshwe isivumelwano.
“Kukhanya kulamankampani athembisayo. Iligi enkulu yiyo engathola usizo,†kubika omunye umfakazi osebenza kuZimbabwe Netball Association.
Phezu kwalokhu, kuzwakale ukuba nxa i-sponsor singatholakala, iligi yezwe lonke kubikwa izahlabusa lonyaka ngoba izakuba lamathimu amanengi.
Kuliviki umgcinisihlalo weZina uLetticia Chipandu kazange athande ukuveza okunengi mayelana lokudinga usekelo lwemali.
Ukhethe ukubika ngokuthi umdlalo wabo uzaguquka kulisizini nje.
“Udaba lokudinga usekelo siphezu kwalo. Akhona amankampani asekele umdlalo ezikolo abalisa iStella Tea, elenkezo encintiswa yizabelo.
“Ngomnyaka lo sikhangelele ukuthi umdlalo ukhule, utshintshe njalo.
Kusenjalo amathimu akuligi yakoBulawayo asethembise ukuthi lonyaka azaletha umncintiswano ongaphezulu.
Kusenjalo, kubikwa kuzakuba lamathimu akoBulawayo okukhangelelwe ukuthi adlale kuligi ephakemeyo.
“Amathimu azakwengezwa. Sikhangelele amathimu abalisa iMighty Queens le New Jets. Amathimu womabili ebekhona kodwa edlalela kunkundla eziphansi,†nguChipandu lo.
Nyakenye iBulawayo Netball ibhode idolobho lonke ikhankasa kumantombazana alethalenta lokuqaga ukuthi azibonakalise ngokuba yingxenye yomdlalo.
Abaphathi bomdlalo kulelidolobho bathe umkhankaso wabo wafinyelela ezikolo lakumakilabhu ekhansili belomqondo wokuthengisa umdlalo kumantombazana angakabi leqiniso lokuthi afuna ukwenzani kwezemidlalo.
Abakhokheli be-netball bathi kade baqala ukuncenga amankampani labantu abalemali kulelidolobho kodwa balokhe betshaya edwaleni.
Sekulesikhathi umdlalo wabodade ungelamali esambeni sawo. Imali kulumdlalo ibonakala nxa kuthe kwaba lomqhugelwano obuthanisa amaqembu ezabelo kumbe uma umdlali ethe wakhethwa kuqembu lesizwe.
Kuleli umdlalo wokuqaga udlalwa kakhulukazi koBulawayo laseHarare.
