Sekuseduzane kumaWarriors

Sekuseduzane kumaWarriors

0 225
USunday Chidzambwa

YiNtatheli kaMthunywa
UMQEQETSHI wamaWarriors uSunday Chidzambwa usencome umdlali waleliqembu uKhama Billiat ngezinga eliphezulu lokudlala alitshengise ngesikhathi bengqikilana leDRC ngoLwesibili.

Lumdlalo uphethe ungutshiki lobhanqa 1-1 enkundleni yeNational Sports Stadium. Iqembu lamaWarriors lanqoba 2-1 kumdlalo wehlandla lakuqala wokuhlungela i-Africa Cup of Nations (Afcon) yomnyaka ozayo.

UKhama, ogijima kuthimu yeKaizer Chiefs kuligi yeAbsa eSouth Africa uhlohle ibhola lakuqala ngemizuzu engaphansi kwemibili ibhola liqalile.

Umdlali lo usephenduke wabayinsika yenguqu yesizwe ngoba ubatshazwa njengomdlali osebenza gadalala ukuthi azidingele ibhola esiswini senkundla ayefika lalo egedini.

Kumdlalo lo, uChidzambwa kafihlanga ukuthi uBilliat uthenjiwe eqenjini lakhe.

Iphephandaba likazulu lenelise ukuxhumana loChidzambwa obike ukuba uBilliat usezingeni elikhulu elisabalalisa ibizo lakhe kumidlalo elandelayo.

“Abadlali bami benze kuhle kodwa kumele sibonge ukuzimisela lokusebenza nzima kukaKhama Billiat.”

Abalandeli benguqu ababukele umdlalo wamaWarriors leDRC baqathanise uBilliat labadlali ababalisa uAllan Shearer oweNgilandi owayengumhlobo womgadli owayesazi ukuhlohla lokuncedisa abanye ukuthi bathole amathuba okudabula amanethi ngebhola.

UBilliat ubakhathazile abadlali be-DRC ngoba ubehlezi elinyazwa lapho athola khona ibhola.

Ubebehlula abavimbi begedi esebenzisana loKnox Mutizwa, eqhamuka ngemuva obekusenza kube nzima ukuthi bamvale.

Kusenjalo amaWarriors asefake unyawo olulodwa phambili kumkhankaso wokufinyelela umqhudelwano we-Afcon.

Ukutshaya iDRC kutsho ukuba isizwe sesikhokhela iqula lika-D ngemiklomelo eyisitshiya galombili.

Okuzabaluleka kulumkhankaso yikuthi iZimbabwe inqobe ngamanengi amabhola ku-Liberia ngenyanga ezayo.

Nxa eqhubeka edlala kuhle, njengalokhu akwenze phezu kwesizwe se-DRC, amaWarriors azaphindela kumncintiswano odibanisa intshantshu zamazwe enguqu e-Africa.

UChidzambwa uthe okumqoka yikuthi iqembu lizibekisele indawo ku-Afcon eseCameroon ngoNhlangula ka2019.

“Okuqakathekileyo yikuthi sivule indawo yethu ku-Afcon ngokunqoba umdlalo olandelayo,” kutsho ulumqeqetshi.

Ugcizelele ukuthi abadlali bakhe kumele baphakamise umdlalo wabo.

“Ngifuna ukubona ukuzimisela okufanayo kubadlali. Angifuni bacabange ukuthi sesibakhulu ngoba sesiseduzane lokufinyelela.”

SIMILAR ARTICLES

0 73

NO COMMENTS

Leave a Reply