uMthunywa
Thokozile Mbedzi
NGENHLOSO yokuthuthukisa ezomnotho ikolitshi yeNational University of Science and Technology koBulawayo sisenza impahla zezikhumba ezenziwa kusetshenziswa amaxolo ezihlahla.
UMqondisi wezokukhulumisana enyuvesithi le, uMnumzana Felix Moyo uthe njengenyuvesithi bazimisele ukuqeqetsha abafundi ukuze babe lolwazi oluzaletha impucuko kuleli njalo luthuthukise lenotho yelizwe.
“Ulwazi lokwenza impahla ngamaxolo luzanika umphakathi imisebenzi yezandla engabenza baziphilise. Ekwenzeni impahla lezi akudingakali mali ezinengi ngoba kusetshenziswa amaxolo ezihlahla okuthiwa yi-mimosa kanye lezikhumba.
“Lokhu yintuthuko enkulu ngoba izihlahla silazo njalo izikhumba lazo zisuka ezifuyweni zethu esizifuyayo,” kulandisa uMnu Moyo.
“Amaxolo la ubuhle bawo yikuthi nxa kuganyulwa izihlahla zokwenza okutshiyeneyo amaxolo ayathathwa asetshenziswe ukuthambisa izikhumba ukuze sithole impahla le okuthiwa yi-leather.
Uqhubekele phambili njalo esithi ukwenza impahla lezi kuzakhuthaza uzulu ukuba ahlanyele izihlahla njalo lokuthi ziqakathekile.
Kubikwa amaxolo asetshenziswayo ayagxotshwa afakwe emanzini okwesikhathi esingaba ngamahola angu-14 loba ilanga kube sekucengwa amanzi athelwe ezikhumbeni ahlale okwamalanga amane kusiya kwamahlanu.
“Ngemva kokufaka isikhumba phakathi kwamanzi la sungathunga yiloba yiphi impahla ongabe ufisa ukuyithunga ngoba kuyabe sokuyi-leather elohlonzi lwaphezulu. Amaxolo uzulu ulakho ukuwachola loba ukuwathambisa enjalo.
“Ngalindlela silondoloza imvelo njalo uzulu angaba ngamaqembu asebenzise ulwazi lolu ilizwe liye phambili kube lamankampani amakhulu avulwayo lomnotho welizwe uthuthuke,” kuphetha uMnu Moyo.
