uMthunywa
Nkosilathi Sibanda
UMQEQETSHI uAmin Soma Phiri uxotshiwe kuqembu leBulawayo City ngemva kokwehluleka ukunqoba ngendlela ayethembise ngayo.
Iqembu leli selixotshe abaqeqetshi abathathu ababalisa uMandla Mpofu loDarlington Dodo.
Imizamo yalo yokudinga ungqondongqondo ongakhuza abadlali iyehlula njalo.
Okwakhathesi ihlezi kunombolo ephansi kulogu iphethe imiklomelo engu-15 kuphela, okuyisitshengiselo sokuba iqembu lakoBulawayo leli selisondelele ukusuka kuligi yeCastle Lager.
Isikhalazo esikhona ngaleliqembu yikuthi kuyini okwehlula ukuthi liphakame lona lilakho konke. Imali ayibuzwa kulithimu ngoba isekelwa yisikhwama sekhansili yakoBulawayo — imali zezakhamizi.
Ithalenta kubadlali alibuzwa njalo kodwa udubo lukubaqeqetshi. Kungabe kukhanya kusenkundleni okulohlupho khona kukanti lukhulu udaba.
UMthunywa uphethe udletshana lokuthi omunye lomunye wenza okwakhe kulithimu.
Kubikwa abadlali babengafuni ukuqeqetshwa nguPhiri.
“Umqeqetshi ubethwele nzima ukukhuza abafana. Kuvele kusemlonyeni womuntu wonke eqenjini ukuthi abadlali abazange bajabule ukuzwa ngokuthi bazaqeqetshwa nguye,” kutsho esinye isiphathamandla seqembu esikhethe ukungaqanjwa.
Kungabe umgcinisihlalo uJerry Sibanda labanye bakhe behluleka ukwenza umsebenzi? Bakhona abaqeqetshi bodumo izwe lonke abahlalele izandla kodwa abanxuswa ukuzokhuza leliqembu.
Izakhamizi zedolobho lakoBulawayo angeke zisolwe ngokutshinga ekuthini imali yekhansili ingabe igelezela ezikhwameni zabanye abantu endaweni yokuthi kuqiniswe leliqembu.
IBulawayo City ingaphansi kwesikhwama sekhansili yedolobho.
Ukusadalala kwaleliqembu sekufike emaphethelweni ngoba imiklomelo yayo kungalane iveza ukuthi okwalithimu sekwehlule.
Ukungena kweBulawayo City ngo2017 kwaletha injabulo kubalandeli benguqu koNtuthu. Khathesi sekuzwisa usizi. Ngomnyaka ophelileyo ngesikhathi esifanayo, iBulawayo City yayisadalala njalo, yaphetha isizini isinde ukuxotshwa, okuchaza ukuthi iqembu leli alikaphakami.
Kusenjalo, uSibanda wazise ukuba uBekithemba Ndlovu uzaqeqetsha ithimu kumidlalo eseleyo.
Leli lithuba lokuthi uNdlovu abatshengise abadala bekhansili ukuthi ulecebo lokukhipha Amakhosi enkingeni.
