uMthunywa
Nkosilathi Sibanda
KULANDELA ukuvulwa kwesiziba sokubhukutsha seLuveve leseMpopoma koBulawayo, sekuvuselelwa amaphupho alabo abalethalenta lokubhukutsha abaphuma emalokitshini akulelidolobho.
Ikhansili yakoBulawayo ijabulise inengi lentsha emalokitshini la ngoba iziziba zombili besezileminyaka eyedlula engamatshumi amabili zivaliwe.
Kungumbono wenkokheli zemidlalo ukuthi koBulawayo sekudingakala ukuthi kulolongwe abanye ababhukutshayo abakhangelelwe ukuthi benze ngcono kulo Kirsty “uMaSiziba” Coventry.
UCoventry usengumphathintambo wezemidlalo kuhulumende njalo wayengumdlali owathola imendulo zama-Olympics eziyisikhombisa kumdlalo wokubhukutsha.
Kumbiko othunyelwe iphephandaba likaZulu, ikhansili yakoBulawayo ibike ukuba iziziba lezi zizavulwa kusukela ngehola lika-10 ekuseni ziyevalwa ngo-1pm, ziphinde zivulwe ngo-2pm zivalwe ngo-6 ntambama.
“Abantwana bazabhadala i50 cents. Labo abaleminyaka yokuzalwa ephezulu kwetshumi lasikhombisa bazabhadala i$2,30.
“Phezulu kwalokhu, kuzakuba lenhlelo zokufundisa abantu ukuthi kudlalwa njani emanzini, izifundo zokuncedisana lokuvikela ukugalula. Kuzaqhutshwa lemncintiswano yokubhukutsha emalokitshini njalo.
Ukuvulwa kwesiziba seLuveve leseMpopoma kutsho ukuba idolobho lakoBulawayo selileziziba ezine ezigoqela le Bulawayo City Pool, Barham Green le-North End.
Abalandeli balumdlalo koNtuthu bakholwa ukuthi sekuyisikhathi esifaneleyo sokuthi izikolo zemalokitshini zisebenzise isiziba seLuveve leMpopoma, zibumbe amathimu aqinileyo ababhukutshayo abalohlonzi abazathola imendulo kumincintiswano yaphezulu.
Ikhansili yakoBulawayo yaqala ukwamukela izikhalazo zezakhamizi mayelana ngenkundla zokubhukutsha ngomnyaka ka-2014 lapho idolobho ligqiba imidlalo ye-Region 5 Under 20 Youth Games kanye lemincintiswano yokubhukutsha eyeCANA Zone VI.
Ngalowo mnyaka kwakusebenza isiziba seBulawayo Municipal Pool.
Lababhukutshi abavela kwamanye amazwe bakhuluma ngokukhululeka ukuthi imncintiswano weCANA Zone VI yatshengisa ukuthi iZimbabwe ilakho ukuba yintshantshu kulumdlalo kuminyaka elandelayo.
Ngaphandle kokuqhuba imincintiswano yokubhukutsha, iziziba zeLuveve leseMpopoma zingasetshenziswa ekulolongeni abadlali be-Water Polo leminye imidlalo engatholakaliyo ebantwaneni bemalokitshini.
Umongameli wezokubhukutsha kuqula elibona ngomncintiswano lo uJace Naidoo ubikele iphephandaba likazulu ukuba kubalulekile ukuthi abantu bafundiswe ngemidlalo efana lokubhukutsha ngoba ilakho ukutshintsha impilo zabadlali abalethalenta.
“Kuqakathekile ukuthi imidlalo ebalisa ukubhukutsha leminye edlalelwa emanzini ifundiswe abantwana. Sesibone impilo zabantu ziguquka zisiba ngcono ngenxa yokuphatheka kumidlalo le,” nguNaidoo lo.
