uMthunywa
Thokozile Mbedzi
ABALIMI baxwayiswa ukuba bananzelele umkhuhlane wokuphunza kokuphela kwezifuyo ngoba kuphambanisa ukuqhela kwesibaya selizwe.
UDokotela wezifuyo eVeterinary Services uNdabezinhle Mkhwananzi uveze ukuthi ngesikhathi sezulu kuba lotshani obunengi okwenza inkunzi zibe lamandla okulandela ezinsikazi kukanti ezinye zazo ziyabe sezihlaselwe yizibungwana ezibizwa ngokuthi yi-vibrio foetus loba yi-campylobacer foetus eziyizo ezenza inkomokazi eziba lebele ziphunze.
UDkt Mkhwananzi uthe nxa umkhuhlane lo ungaselatshwanga izifuyo ziyaphunza kokuphela bacine belahlekelwa yinzuzo yabo.
“Umkhuhlane wokuphunza uhlasela izifuyo ezinsikazi nxa zingalandelwa zinkunzi ezilamagcikwane e-vibrio foetus loba i-campylobacer foetus.
“Ungabona inkomokazi yakho ilandelwa yinkunzi okwamalanga aphakathi kwangu-10 kusiya ku-60 kutsho ukuthi iyabe isilomkhuhlane wokuphunza ngoba kumele ilandelwe insuku ezingu-21 nje kuphela,” kutsho uDkt Mkhwananzi.
Kubikwa inkomo zandise ukuphunza kunyanga yesihlanu loba eyesithupha.
Uqhubekele phambili eveza ukuthi okwenza umkhuhlane lo ube yingozi yikuthi inkunzi ezilomkhuhlane lo kazikhanyi.
“Umkhuhlane lo ubonakala ngemva kokuhlolwa kwesifuyo emalabholetholi esayensi (laboratories) ngendlela yokuthatha amasampuli ezifuyweni.
“Abalimi kumele behlukanise inkunzi abacabangela ukuthi zingabe zilomkhuhlane wokuphunza ukuze zingahlangani lezinsikazi,” kutsho uDkt Mkhwananzi.
UDkt Mkhwananzi uthe lanxa umkhuhlane lo uyingozi okuhle yikuthi uyelapheka.
“Umkhuhlane lo uyelapheka njalo umlimi ulakho ukuthi ahlabe izifuyo zakhe amajekiseni kabili ngenyanga.
“Umlimi kumele ahlabe izifuyo zakhe kabili zingakalandelwa zinkunzi. Lokhu kuzenza izibaya zabo ziqhele,” kutsho uDkt Mkhwananzi.
Uphethe ngokucebisa abalimi ukuthi bahlale beqaphele umkhuhlane lo ngoba uyehlisa inani lokuzalwa kwezifuyo umlimi acine elahlekelwa yinzuzo yakhe.
