Qaphelani lingabulawelwa amabhizimusi

Qaphelani lingabulawelwa amabhizimusi

0 168

Musa Janga
ABALIMI sebekhuthazwe ukuthi bakhaliphe babone ukuthi intengo abathengisa ngayo izifuyo zabo iyenelisa ukubathengela ukudla kanye lemithi yezinye izifuyo.Inkuthazo le iza ngemva kokunanzelela ukuthi abalimi abanengi lokhu bethengisa inkomo zabo ngemali ephansi kukanti abamabhutsha sebekhwezile intengo yenyama emabhutsha.

Inyama yenkomo emabhutsha amanengi koBulawayo isiqalela ku-$13 ikhilogilamu eyodwa kusukela kumaviki amabili adluleyo.

UMthunywa ukhulumisane loMnumzana Cosmas Muzunde onguLivestock Specialist kunhlanganiso yeLivestock Production Development obike ukuthi abalimi kumele bahlakaniphe bangaqilwa ngosomabhizimusi ngoba bona bathenga inkomo kibo ngemali encinyane bona bayethengisa inyama yakhona ngemali ephezulu.

“Inyama isikhwele kakhulu, ikhilogilamu yenyama yenkomo isibiza i$15 kusiya ku-$17 kukanti umlimi uyabe ethengisa inkomo zakhe ngentengo ejwayelekileyo eye $400 kusiya ku$500.

“Okwenza ngikhulume kanje yikuthi osomabhizimusi laba bafuna ukubulala abalimi.

“Abalimi nxa bethengisa inkomo zabo bayabe befuna ukuthengela ezinye inkomo zabo ukudla kodwa ucina esehluleka ngoba uthi efika ezitolo athole imali athengise ngayo inkomo ingaseneli ukuthenga ukudla,” kuchaza uMnu Muzunde.

Uqhubekele phambili esithi ukudla kwenkomo kanye lemithi sokudula kungakho sokunzima ukunakekela inkomo ngakho umlimi engekela ukuthi laye akhuphukise mbijana intengo yenkomo kuzabanzima ukuthi enelise ukunakekela izifuyo zakhe.

Uphethe ngokuthi abalimi nxa bengakuzwisisi lokhu babuye emahofisini abo aweCommand Livestock Production bezothola ulwazi bancediswe ngalokhu.

“Silamahofisi koBulawayo, amanye akhona aseMhlahlandlela ngakho abalimi nxa befuna ukwazi kuhle ngalokhu kabasivakatshele, iminyango ihlala ivuliwe,” kuphetha uMnu Muzunde.

SIMILAR ARTICLES

NO COMMENTS

Leave a Reply