uMthunywa
Nomthandazo Ndlovu
INHLANGANISO yeVeterinary Services ikhuthaza abalimi ukuthi bananzelele njalo bavikele izifuyo zabo emikhuhlaneni ethwalwa zinyamazana zasendle.
Ekhuluma loMthunywa uDokotela Khumbulani Sibanda uthe abalimi abanengi balahlekelwa yizifuyo zabo minyaka yonke ngenxa yemikhuhlane le abangayinanzeleliyo.
“Imikhuhlane enjenge-anthrax, foot and mouth kanye lesikhwekhwe yimikhuhlane evela ezinyamazaneni zendle, imikhuhlane le iyingozi kakhulu ngoba iyabulala njalo iyathelelwana.
“Eminye yemikhuhlane le singangena lebantwini okuyingozi kakhulu ngoba imikhuhlane enjalo nxa silesikhathi ilakho ukubulala umuntu,” kutsho uDkt Sibanda.
UDkt Sibanda uqhubekele phambili wathi abalimi abalezifuyo ezinatha egangeni zisengozini yokuthola imikhuhlane le.
“Amathe enyathi ayingozi kakhulu yiwo alegcikwane le-foot and mouth ngakho nxa izifuyo zinganatha lapho okunathe khona inyathi ziyawuthola umkhuhlane lo, okuyingozi ngawo yikuthi uyathelelwana umlimi sengalahlekelwa yisibaya sonke nxa engawenqabelanga masinya ukuthi umemetheke.
“Okuqakathekileyo yikuthi umlimi abonane labodokotela be Veterinary ngokuphangisa nxa esolela ukuthi izifuyo zakhe zingabe zihlaselwe ngeminye yemikhuhlane le,” kuqhuba uDkt Sibanda. “Umlimi kumele agqibele kumbe atshise izifuyo lezo ezibulewe yimikhuhlane le, akumelanga zidliwe kumbe aziphekele izinja ngoba kuyingozi,” kuphetha uDkt Sibanda.
