uMthunywa
Mehleli Dube
KUZITSHUDENI ezibhala imihloliso ekupheleni komnyaka yiso isikhathi sokudonsa gadalala ufice angani lijongosi elithanjiswayo. Phela kuwe wena obhalayo ilanga selisiya ngomutsha wendoda.
Sokumele ukuthi ubususazi lapho oyakhona. Yiso isikhathi sokugcwalisela izifundo eziyabe zisalele lokunye okutsha nje. Umngane wakho omkhulu okungamelanga wehlukane laye ngumbalisi wakho lengwalo zakho.
Lalapho umbalisi wakho ekude omakhalekhukhwini sebenza kwabalula ukuthi umbuze ngoba uphuthumisa umlayezo umbuze amane akuphendule ubusuqhubeka ngokutaditsha.
Nxa umhlupha ngemibuzo uzabona umbalisi wakho uzakuthanda ngoba enanzelela ukuthi into akufundisa zona zikunika intshukuntshu lomdladla wokuthi wazi kabanzi. Laye uzabona kumgqugquzela kumthokozise aze akuboleke lezinye ingwalo zakhe. Zikhona ezinye izitshudeni ezingelandaba lezifundo kubo kuhlala kulikhefu. Azame ngamandla wonke umbalisi ukuthi akukhuphe umfasimba wokungazi oyabe ukuvale inkophe kodwa ufice isitshudeni singagqize qhakala engabhali ngitsho lomsebenzi wangekhaya ayabewuphiwe ngumbalisi.
Kwesinye isikhathi uzwe okungonkabi kuyengana kusithi angenzanga okufunwa ngumbalisi kukhohlwe ukuthi okhawulayo yikho ngoba umbalisi eselezathifikhethi zakhe. Omunye uyabe elinga ngamandla wonke kodwa ufice ukuthi udiwo lufuze imbiza ngoba mhlawumbe abathwebula yena labo kuyabe kusemadwaleni entabeni zematojeni kuzifundo.
Phela isintu sithi isondo lemuva linyathela elaphambili. Ngikhumbula omunye umbalisi wabiza umzali wesitshudeni emazisa ukuthi umntanakhe uhlutshwa yikwazi imifanekiso watsho ekhomba umfanekiso wedube wezwakala umzali ethi hantsho idube ngesilungu yi-lion wahle wayifunda ivaliwe.
Kwesinye isikhathi inkinga ibekubabalisi ikakhulu laba ofica ebhale I O-level ele 4 sittings, kambe loba angaze abufundele ubutitshala kuyini angakufundisa izitshudeni? Yikho kwezinye izikhathi impumela sezithe zaxamalaza, isisusa senkinga siyabe sikumbalisi. Phela ukuphindaphinda kuyabe kukhomba ukuthi ithalenta lakhe alikho lapho.
Kodwa ngenxa yokuhlupha kwemisebenzi umuntu amane azijikele lapho inhliziyo yakhe ingekho khona besekukhalwa ngezitshudeni. Izitshudeni nxa ziphiwa uluhlu lwezifundo oluqondileyo lombalisi ekhuthele ngitsho sibi sempuphuthe iyathungulula.
Indoda ezala mina yayihlezi iqonqosela ukuthi akukho nhlamba edlula ukungasi umntwana esikolo. Ayixabene.
Mehleli Nkunziyembongolo Dube 0738305027.
