uMthunywa
Mehleli Nkunziyembongolo Dube
UKUPHELA komnyaka kuletha ukujabula lentokozo emangalisayo kwabanengi. Phela yonke into yenziwa ngobunono langezinga eliphezulu kakhulu. Kuyajatshulwa ngoba lezihlobo esikade sazicina ziyavakatsha kuhlatshwe ombuzi, onkukhu kukanti kulabo ezidlana uboya bawisa inkomo. Kulalwa ngezibomvu emakhaya.
Kuza lalabo abasebenza emazweni esakhelene lawo lamanye aphetsheya kolwandle. Ngizagxila ikakhulu kulabo abasebenza eGoli esibabiza sithi zinjiva. Ezinye zakhona zingakudlela imali ucabange ukuthi zidla umuthi womvusankuzi. Khona nxa zisanda kufika uthola angani ziyaqunjwaqunjwa zingafuni lokubeka isibunu phansi.
Ziyabe zihaluzela zisiya le lale sengathi yinkomokazi ebifihle inkonyane yathola isidliwe ngamakhankha, yona iyedinga amanzi emaxhaphozini akothukela. Zonke izinto ezithengwayo zithengwa ngambili ngantathu kuzanywa ukutshengiswa abaseduze ukuthi imali ikhona.
Uthole labo qhwayilahle sebethe sece ikhukhumale injiva icabanga ukuthi abantu bayayithanda kanti bazifunela amarandi, nxa ephela batshedela khatshana bakuhleke usulu baze bakhanyise lesilakalaka baveze lelenja.
Phela ilizwe lakithi lilokuthula okumnandi, nxa ulemali yakho uyidla ukhululekile kungelampazamo. Kuyakube buhlungu ikhefu leKhisimusi seledlule umuntu esefuna ukubuyela kodwa engasela ngitsho lelesikhala indibilitshi. Uthole umuntu esethengisa amabhatshi, izicathulo, omakhalekhukhwini ngentengo ephansi okwamagama.
Akade usidla labo bayabe sebeme bucwadlana sebebona ukuthi isikwaya sesitshelwe ngamanzi. Dlana imali yakho uklamase, uqolotshe kodwa eyokuphindela emuva uyibophele uthi mfi ekhalweni, abangelakho okokuthengisa bacina betshontsha bezama ukudinga yona eyokubuyela.
Masijabuleni singakhohlwa ukuthi kulekusasa. Ngilifisela ikhefu leKhisimusi elimnandi.
Ayixabene.
07383050270
