uMthunywa
Cornelius Luphahla
Bakwethu angithi babengasomi omandulo nxa babethi kusinwa kudedelwana. Nanku sikubona ngamehlo ikwindla lidedela ubusika, bona budedela intwasa, layo idedela ihlobo okuyilo eselithwasise umnyaka lo esikiwo sesibheke lo ozayo ukuba usiphatheleni. Kakho okwaziyo ukuba usiphatheleni, kwazi uMvelinqangi kuphela.
Injalo impilo bakwethu, emhlabeni okungapheliyo kuyahlola. Ngalokhu-ke ngilethemba lokuthi nxa kade abantu bakaMthwakazi betshumayela bekhuza ububi koMthwakazi lonyaka, kulo umnyaka ozayo kuyabe kukhulunywa ngokunye lokhu sokulungile. Yikho-ke esikukhangeleleyo Mthwakazi kaNdaba ukuze sithuthuke.
Angithi nje omandulo babengahlayazi nxa bethi thutha cimbi amaphane aphelile nje? Yikho lalabo akade behlupha kulo umnyaka esikuwo ngilethemba lokuthi imikhuba yabo le bazayitshiya emnyakeni lo ngoba bengaphetha befana xathu lecimbi eseliphelelwe ngamaphane.
Kulo umnyaka ozayo bakwethu ngilethemba lokuthi wonke umuntu ukhangelele ukuthuthuka ngakho ukuze sithuthuke kuqakathekile ukuba sibambane. Ngiyazi Mthwakazi ukuba abanye babophe amaqhinga amabi abafuna ukuwenza kulo umnyaka ozaqala. Asazi-ke kulabo ngoba bazawela engozini ezimbi kakhulu ngoba kuvame ukuthi umuntu engaqala umnyaka ngokubi aze ayewuphetha ngobubi.
Abanye ngiyazi abakholisanga ngekhefu leKhisimusi njalo lobubi ababenzayo abuzange babonakala ngakho khathesi sebefuna ukukholisisa. Nanzelela-ke wena ofuna ukukholisa ungakholisi uze wedlulise amalawulo ngoba uzawela engozini. Lawe ojonge ukuqhubeka ngobubi ngosuku lomnyaka omutsha nanzelela ngoba sukhasela eziko njalo uziholela amanzi ngomsele.
Mthwakazi kaNdaba ukujabulela umnyaka omutsha akusikho cala kodwa kuqakathekile ukuthi ujabule uzinanzelele ukuthi ujabula njani. Ngikhuluma nje abanye abantu balahlekelwa zimpilo zabo ngelanga leKhisimusi kuthi abanye balimala khathesi bayizigoga, abanye njalo basemajele ngenxa yokuthaba kakhulu lokuganga abakwenza ngeKhisimusi.
Njengoba nje khathesi isizwe sethu sikhala ngokuswelakala kwezulu ngilethemba lokuthi umnyaka lo ozayo uzakuba ngcono ngoba kusinwa kudedelwana, indlala izadedela ukusutha. Kakho okwaziyo lokhu yikho nje ngithi asazi ukuthi umnyaka lo ozayo usiphatheleni. Nxa kuzindubo zodwa lakho sizazibhensela okukababhemi wakoNkohlo owabonwa ngabantu njengoba sesizejwayele.
Noma kunjalo bakwethu ngithanda ukulikhuthaza ukuthi kuqakathekile ukuthi umnyaka lo siwulungiselele ukuze singathi usiphathele indubo ngeke uthutshe usisitheka lendubo nxa siwulungiselele ngokusebenza gadalala ngoba sizaziceza. Kuzakuba njalo emavileni afuna ukukhangezwa, azakhala isimayemaye okwamanina asendulo.
Mthwakazi okokucina ngithi njengoba singazi ukuba umnyaka lo usiphatheleni kubalulekile ukuthi sisebenze ngokubambana. Labo abebesenza ububi kabadele ububi lobu bahambe ngonyawo olutsha kulo umnyaka omutsha ukuze uMthwakazi athuthuke.
