uMthunywa
Mehleli Dube
SIYABONGA ukuthi sathi sithola uzibuse wagqugquzela wonke umuntu oyisizalwane sakuleli ukuthi akhathalele imfundo, ngoba iyisikhali esivula umuntu ingqondo, ajule lekucabangeni. Wenza kwaba lama night school, ngitsho obhudi labosisi ababesempini bathola ithuba lokuya esikolweni, ikakhulu labo abalandela umlayezo wakho.
Enye yento engikuncomela yona yikuthi iqiniso uyalikhuluma, uvele ulibeke obala kungakhathelekile ukuthi ngubani. Ngikhunjuzwe yinkulumo yakho usezweni le Botswana, lapho owathi khona iSA ifuna enye irevolution ngoba inengi labansundu alila lokhu abathi yiEconomic Freedom. Phela kwele South Africa abelungu bayakhonzwa, inengi loluntu lwakhona alukholwa ukuthi izinto zingahamba nxa kungela mlungu phakathi.
Ngadana emnyakeni odlulileyo ngivakatshele eGoli, umfanami wangithatha saya kwenye indawo yokuzithokozisa, safica bengavumeli ukuthi abansundu bangene. Ngenkani, ngangena ngoba sengimtshele ukuthi ngiyisivakatshi.
Into eyangizwisa ubuhlungu yikuthi umantshingelane owayesala ukuthi singene wayengowebumba elimnyama njengami. Ngakhumbula ukuthi kwelakithi ngeke ukuthole.
Ngenkuthazo yakho Mongameli safunda ukuxolelana njalo lokuhloniphana, lokuhlalisana kungakhethelekile ukuthi ungonsundu kumbe omhlophe. Ngiyangimangale injiva ezinengi nxa zingafika lapha ekhaya ufica ziqolotsha, ziklamasa sezivuse umhlonga, zikloloda angani ngokuyinkonyane kwensengwakazi okufohle empondo zankomo kwamunya kwaze kwaphinda umphehlo. Kodwa nxa beseMzansi ufica begoqe imisila angani liqhude elinethwe yimvimbi. Ngikhumbula njalo ubatshela oTony Nleya ukuthi isiko lobutabane ngeke uze ulivumele kwelakithi ngoba kungasinto ekhwabithekayo. Yikho leAfrica yonke ikuhlonipha ngoba isazi ukuthi nguwe oyi-mouthpiece yabo, ekukhulumeni iqiniso ngitsho sibi somhlaba wonke jikelele.
Khathesi ukhethiwe ukuthi uthungamele iAfrica ngoba inengi laboMongameli bamanye amazwe besacathula kwezepolitiki, yikho bebone kungcono bafake wena ngoba usungumkantshu ‘bomvu kwezokukhokhela izizwe.
Kulento njalo engihluphayo ngokwenziwa ngabanye bethu lapha ekhaya bangcolisa igama lakho lezenzo zakho ezinhle, bahamba bethathela abantu amapulazi abawanikwa nguHulumende wakho besithi bathunywe nguwe, ngiyazi bayabe beqamba amanga ngo abanye bakhona sebabotshwa.
Kwesinye isikhathi ngiyake ngifise ukuthi ngabe ngile nombolo zakho ezikamakhalekhukhwini ukuze ngibacebe ngoba ngingafuni ukubona izizalwane zakuleli zihlukuluzana. Elami elokucina lithi qhubeka ngomsebenzi wakho omuhle utshela izizalwane ze Africa iqiniso, sizigqaje ngobunsundu bethu njalo sihloniphe eminye imihlobo.
Ayixabene
Mehleli Dube 0772673682
