Uncategorized

Phos’ elakho: Kungcono ayegulela kumkakhe!

04 Oct, 2018 - 02:10 0 Views

uMthunywa

Mehleli Nkunziyembongolo Dube
IZOLO kusadliwa ngoludala, isiko lemikhuba kusalandelwa, indoda ibibonakala ngenkomo lenxuluma yomuzi njalo izele. Amadoda amanengi abelesithembo kweminye imizi uthole indoda ilamakhosikazi amahlanu.

Kodwa ngokuhamba kwempucuko mhlawumbe lendleko zokunakekela imuli sokuthathwa ikhosikazi libe linye. Ungabatshatshamisa abantwana ngenxa yenguquko esezikhona ucina usehluleka ukunakekela.

Isimanga nje loba amadoda esesenqaba ukuthatha amakhosikazi amanengi, kuvamile ukutholakala eledlalicatsha, “i-small house”. Lebizo lakhona likuchaza sobala ukuthi ngumuntu odla okungesikwakhe yikho nje ecatsha engafuni kubonwa mahlayana. Phela okungokwakho ukufaka izinyo ungagqize qhakala loba uphezu kwentaba. Bakhona odade ofica kuyibo asebelesithembo samadoda. Abanye wawuzwe sebeklamasa bethi indoda yomnikazi inhle ngoba ayila “total control over you”. Umane uzenzele umathanda.

Kubi kakhulu ukuthi uyindoda ethetheyo ubeledlalicatsha ngoba uyabe usephula umoya wekhosikazi lakho.

Ngenxa yesimo somnotho esingamanga kuhle, abaziyo njalo aseke baphunyuka kumadlecatsha bathi akuhanjwa ungathwalanga lutho. Nxa usiyakhona uthwala ezimnandi kudliwe balale ngesibomvu loba emzini wakho umangoye elala eziko. Ukudla ohamba lakho kuyakhethwa, akuthwalwa matemba, kufuneka osibindi amaqanda lakho konke nje okumnandi. Amanye amadoda abayizithutha ufice esekhonze khonale adliwe umuntu baze bamzwele omakhelwane. Omunye uthola esikhathini engasabhadali indleko ezifunwa yimuli yakhe, aphikelele ukubhadalela abantwana bedlalicatsha, abangasibakhe.

Abanye ngabadela imizi yabo avele etshathe imitshaqana yakhe ayehlala khona, engadliswanga ngitsho lakancane, kusenziwa luthando lwamanga. Ungazama ukumlimukisa ukuthi aqaphele angaze adela umuzi wakhe ukhwaza okwendlondlo elophaphe ekhanda egqitshelelwe umlindi ngomayelane isifukama, khona okungonkunzi kuzidingela umuhlwa. Abanye ngabadela lolimi lwabo ufice sokukhulunywa olwabondlebe zikhanyilanga sokuphonguba ngo “daddy, sweetie, my love”.

Kuthi ngokuhamba kwesikhathi kuvele umkhuhlane kumbe kuphele leyo mali uxotshwa njengenja engene emkulwini olokudla kwekhisimusi. Ngikhumbula enye indoda yathi isigula kwezwakala abangane bedlalicatsha lakhe besithi kungcono ayegulela emfazini wakhe.

Lakanye bamthwala bafika bamtshiya egedini lomuzi wakhe batshaya inkotha. Phela bathi amadlecatsha ahlala engokhangezile abafuni kudliwa loba semsiza kangakanani. Ngiya ngizwe abanye nxa sebeyiphephethile indoda uzwa bethi dlana imali kusalindoda uyixotshe. Enye indoda eyaphunyuka khona ithi amadlecatsha kalathando, uthando lwakhona lufana lolwamaganyane ebona impala eqhulayo. Inengi lamadoda aphunyuka khona bathi amanengi amadlecatsha afukamele imikhuhlane eminengi ecina ibulalisa ikhosikazi lomuntu ngokuzithoba. Lawe ndoda nxa usahamba kulowo mfolo phunyuka, ngoba lencwadi engcwele iyatsho ukuthi ungafebi, akekho owaphikisana layo walungelwa. Ayixabene.

0738305027.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds