uMthunywa
INCWADI engcwele eka Mvelingingqangi iyakufakaza ukuthi hlonipha uyihlo lonyoko ukuze insuku zakho zande ezweni. Kukanengi ngibona abantu bedlala ngabazali babo, bajinge bakhale phambilini izinto zingasabahambeli kuhle.
Abanye baze bayetshaya phansi ngedolo engcwabeni becela uxolo. Umuntu uyathi esakhomba ngophakathi akhohlwe ukuthi omama yiwo amakhumbi ethu okuza emhlabeni, atshakale aqolotshe sikhale ezimathonsi silokotha lokhu lalokhuya bangasinaki isalukazi senkosi. Akhohlwe umuntu ukuthi nguye owakuqala ukwazi ngaye abantu emhlabeni. Omunye ukhohlwa lokuthi uyilokho ayikho khona ngenxa yalababantu.
Abanye ngababa lenhlanhla empilweni, umuntu athole umsebenzi omnika iholo eliqhotshwana ufice umkhaba sule, izihlathi zicwebezela angani ngumntanenduna esidlimali yamacala. Abanye ngabathi nxa esethe wedlula emhlabeni uthole kuyikho kuthengwana lengubo ezinkulu ezedlula ingubhamazwi kaLozikeyi, lebhokisi elidula okwamagama, kodwa ungazange umnakekele esaphila.
Isixwayiso sami sithi wena olomzali osaphila mphathise okweqanda, angamane akuphunyuke mahlayana.
Lapho ekhala ngokuthi menzele ngenhliziyo emhlophe, uzathola izibusiso ezigcwala udengezi. Ungayengwa ngabantu, zikhona inkinga ohlangana lazo ekuphileni uze ufise ukuthi ngabe bayaphila ubethulele ijogwe elikusindayo loba usumpunga. Ngiyake ngizwe ubuhlungu ukubona umuntu edlala ngabazali ngithi ngabe ubuza kimi ngoba bona sebaya kobhekabezayo.
Yikho loba umuntu angaze abe yisikliwi kumbe agule loba yiwuphi umkhuhlane umama uyazinikela kungakho lathi kasimeni labo ngoba nxa sebekhulile sebefana labantwabethu.
Ayixabene.
Mehleli Nkunziyembongolo Dube 0738305027.
