uMthunywa
Silo Cornelius Luphahla
BAKAMALANDELA umhlaba ulendaba ezinhle kanye lezimbi njalo zenzakala kusa kwamalanga. Ekwenzekeni lapha phela kukhona okuthutsha uzulu engalindele kubuye njalo kube khona okwenzakala umphakathi ubhekile.
Njengoba enkundleni kazulu zihlala zihlahlelwa indaba zingqikilwe kube kuhle kube njeya ngakho kule iviki ngizake ngiphathe enye njalo indaba. Phela abadala babeyitshaya ekhaleni nxa babethi liphuma lendaba litshone lazo ezijabulisa umoya lezibuhlungu. Unjalo umhlaba bakwethu.
Khumbula ukuthi ezimbi ezehlela abasemhlabeni bayabe bengazilindelanga, inengi labo baze badideke ukuthi kungabe kuhambe njani yikho phela abantu abadala bethi elokufa kalitsheli.
Okunye emhlabeni kwenzakala ngenxa yobukhunkuli babantu kuthi okunye kwenzakala ngenxa yentando kaMvelinqangi. Loba kunjalo bakaMalandela kakho owake wazimisela ukwehlelwa yingozi empilweni yikho nje engekho owake wamema ukufa.
Ngangizwe abadala bethi indlela kayikhulumi okuveza sobala ukuthi umuntu nxa ehamba uyabe engazi ukuthi uzadibana lani endleleni. Lokhu kumqoka sibili ngoba ngabe uyabe ekwazi ubengekho ongavelelwa yingozi esemangweni.
Okunye njalo amaNtungwa ayengahlayazi nxa ayethi uhambo lwenja lusenhliziyweni yayo. Lokhu kubonakala sobala sibili ngoba lakho akwaze kwaba kuhle ukuthi ohambayo abikele uzulu wonke funa abikele izitha ngakho kuyabe kufanele afane lendlela engakhulumiyo.
Yebo kambe abadala babexwayisa umphakathi ukuthi uyifumbathe indaba yempilo yawo kodwa kwakube kuhle ukuthi ohambayo lo abikele oyedwa emdenini, amthembileyo kumbe ababili ukuze njengoba indlela le ingakhulumi nxa kuthe kwavela ingozi umdeni wazi lapho ozadingela khona.
Qaphela ukuthi layo indlela le engakhulumiyo oMandulo babemana bahlahlule bayekuthi nyoka ngiluma baluthole ulwazi lokuthi indlela imi njani. Yikho nje endulo kwakungavamanga ingozi ezinengi.
Kulezinsuku isiko selatshabalala, sebebalutshwane abantu abaziyo ukuthi kulokuhlahlula yikho nje ingozi zivamile empilweni. Phela ukuhlahlula lokhu abadala babekwenza ngokukhalipha njalo kwakuyimfihlo enkulu yomdeni. Loba yayiyimfihlo yomdeni kwakungayisiwo wonke amalunga omdeni ayebikelwa ngaloludaba.
Khumbula ukuthi akugeza laswela isiyinga njalo emdenini akuswelakali inyoka. Yikho phela kuthiwa ungamthembi umuntu loba eyisihlobo sakho.
BakaMalandela lingalibali ukuthi indlela le engikhuluma ngayo ukuthi kayikhulumi ikabili. Okwesibili kungaba yikuthi umuntu kaze wazi okuzakwenzakala kusasa njengoba nje bethi elakusasa kalitsheli.
Mthwakazi omuhle ngithemba ngike ngancwebancweba kancane mayelana lempilo kulo umhlaba, sokusalele umphakathi ukuthi ukhukhuze ubuye njalo wengezelele amahwahwa lenyama kulelithambo.
Kusinwa kudedelwane-ke mahlabezulu ubuntu, ukuthula, ukuthembeka kanye lokubambana akwande ukuze sakhe isizwe sethu.*
Amazwi kaCornelius Luphahla okucina engakawutshiyi umhlaba.
