uMthunywa
‘‘ISALAkutshelwa sibona ngomopho,’’ la ngamazwi abokhokho aveza ukukhalipha kwabo nxa bexwayisa lo oyala ukulalela lokho akucetshiswayo ngabadala.
Isaga lesi sitsho ukuthi lo ongalaleliyo kumbe olihlongandlebe ucina ngokuwela engozini ezamenza azisole kodwa kungasela ncedo ngoba sekutsheke ibhetshu kudala.
Mthwakazi omuhle kule iviki size layo njalo indaba elimukisa izephulamthetho ezingakhuzekiyo eziphinda isenzo esibi njalonje loba ngaze bephiwe sijeziso bani.
Kambe uyabe ungumuntu onjani ongazizweliyo na? Asazi kumbe uliqaqa bani elingazizwa ukunuka.
Uyahamba uyentshontsha komakhelwane ubanjwe ubotshe uvalelwe entolongweni amakhiye esango ajikelwe khatshana okwesikhathi eside. Uthi ukhitshwa ungakafiki endlini ubanjwe sugqekezile njalo.
Isizatho esenza kwakhiwa intolongo yikuthi abantu abephula umthetho kumbe abehluleka ukuphila ngendlela ethokozisa abanye bayethola ulwazi lwabo ejele, hatshi ukuyakhawuliswa.
Yebo, uHulumende wenze isenzo esihle ngokukhipha izibotshwa phandle kodwa kolunye uhlangothi udalele uzulu obunye ubunzima. Nanko phela izibotshwa ezisanda kuphuma seziqalisile ukuhluphana labomazithulela phandle.
Likhona ijaha lakoBulawayo elikhitshwe kanye lezinye izibotshwa, khathesi kuzwakale ukuthi lithe lingakafiki endlini beseligqekeze kwenye indawo labanjwa ngamapholisa labotshwa.
Lokhu kusuka kudide ingqondo yabanengi ukuthi kanti vele kuyini okufundiswa abantu entolongweni ngoba phela ungathi ungakahlali ngitsho lelanga uphumile sudala elinye icala, asazi Mahlabezulu kumbe ijele selantshintsha labamnandi njengasendlini.
Likhona njalo elinye ijaha lakoNtuthuziyathunqa elifikele ukubhaxabula amaloja alo ngenduku kubangwa umthelo wendlu. Amaloja la ebevele ehlezi kuhle kodwa-ke konele ukuphuma isibotshwa lesi sabuya sababhuqa. Asazi kumbe abalinda izibotshwa sebakhohlwa umsebenzi okumele bawenze ukuze izibotshwa ziqonde njengoSolobhoni.
Funda ukukhuzeka, ungabi lenkani njengetshongololo ngoba ukungezwa kwakho akukhathazi wena wedwa, cabangela imuli yakho kumbe inina elizala wena lesithunzi salo.
Bakhona abanye abantu abona ngephutha bacina sebevalelwe bakhuzwe bezwe. Wena hlongandlebe suzabenza baphile nzima entolongweni ngoba uHulumende sengaqinisa umthetho ngoba kukhanya kungani akula mfundiso etholakalayo ejele kucine kulimaza labo asebafundayo ukuthi ububi abulunganga.
Asikulanduli ukuthi wonke umuntu uyaphambanisa kodwa-ke mahlabezulu asikhuzaneni sifundise abantwabethu indlela eyiyo njalo labo abakhuzeke babekwazi ukuthi kuyini okumele bakwenze ukuze isizwe sihlale ngentokozo.
