uMthunywa
Mehleli Dube
Ilizwe lakithi lathi lithola uzibuse kwaguquka njalo kwasungula okunengi. Umuntu wayesengamane enze loba yini ngoba kulilungelo lakhe.
Lakundima yezokukholwa kwenzakala okunengi. Kwavumbuluka inkonzo zamabandla zaba zinengi. Zamila zasabalala ngelizwe, njengoba lesifundisi sakhona singahanjelwa ezikolweni, umane nje uzwe kuthiwa uzibani banyana sengumfundisi selebandla lakhe.
Isimanga yikuthi inengi lamasonto akhona angena ebusuku kumbe emaqaqeni khatshana labantu, bayengwe abantu bathatheke bazibone sebemi bodwa ekhunjini lomfula.
Kuleyinye engingasoze ngiyiqambe ngebizo, eyekelisa abantu ukunatha amaphilisi, baphiwe amanzi okuthiwa ahlanganiswe lomchamo wenkwilimba.
Kambe akusimoya omubi wona lo? Wekelise umuntu ophila legcikwane lengculazi ukunatha amaphilisi akhe.
Lulunya oluphindwe kangaki lolu, angithi luphindwe kathathu, yibuthakathi bezigodo ngempela.
Ezinye zakhona kuyabe kubhodwa ngemizi yabazalwane kubanjwa okuthiwa ngabathakathi imideni ixabane kubangelwa yikuthi uyabe eseyekeliswe amaphilisi umuntu olesifo esifana laboBP letshukela afe umuntu wenkosi, besekuqanjwa amanga kuthiwe umoya uthi ubulewe nguzibani behutsha aluhlaza tshoko amanga.
Angitsho ukuthi abathakathi abakho, kodwa ngithi ezinye izinto kasiqapheleni sibhekisise ngeso elibucayi.
Into esuke ikhathaze umoya wami yikuthi inengi lalawa amabandla eza emhlubulweni wemaNdebeleni evela khonale endaweni ezitshiyeneyo, bahuquluze abantu izifuyo zabo, lemideni isale ibhekelana emanzini ngenxa yalezi sonto zemimoya. Bona abathi babona okungabonwa yithi abenyama. Uthola umuntu ogulayo egajiswa ethunqiselwa ahitshwe akhwehlele aze akhuphe igazi, kambe umuntu uzathi ebulawa ngumkhuhlane wofuba uphinde umthunqisele, yikumcobodisa.
Abanye ngabagajiswayo aphiwe lamanzi omthandazo ahlanganiswe labo sawudo atshokoze kwesinye isikhathi ahude umuntu yena evele engelamanzi emzimbeni aphiwe imbodlela ezizamqeda amanzi emzimbeni. Yikho ngisithi ezinye isonto zemimoya zilomoya omubi, azelaphi ziyabhidliza umphefumulo womuntu.
Ayixabene. — 0738305027
