Uncategorized

Phos’ elakho: Bodade lingabazala libathe izibongo zabo zoqobo!

30 Aug, 2018 - 00:08 0 Views

uMthunywa

IZOLO izibongo lezangelo zomuntu bezidazulula ziceze indlela lemvelaphi yakhe. Bekuthi nxa esetenywa umuntu bemutha langezibongo zakhe loba esezonde esegane unwabu wawumbona esemoyizela ebobotheka ejabulela ukuthi uyamazi awumphumputhi aphange axole.

Labakholelwa emadlozini babeziqakathekisa izibongo ngoba bengafuni mpazamo nxa sekukhulunywa labasemakhazeni, funa phela izinyoka zomdeni zingamkeli izikhalazo ngoba esebenzisa isibongo esingesisakhe.

Lezinsuku kuvamile ukuthola umuntu esebenzisa isibongo sakomalume loba esakoyisemkhulu. Zinengi imbangela ezenza umntwana acine esebenzisa isibongo esingayisiso sikayise.

Kwezinye izikhathi odade benza ngamabomu akhombe umuntu akwazi mhlophe ukuthi utshadile ufice eqolotsha eklamasa atshikize iqolo uthole sengani yinkonkoni esithabele amanzi emveni kokuqeda iviki ezimbili inganathi lesadijana sayo sesome qha.

Athi ngokwesaba umthetho wokuzaliswa ngumuntu otshadileyo athiwe isibongo sikanina. Phela lomamzalisa uyabe esesaba ukuchithekelwa ngumtshado lendleko zesondlo. Kuvamile njalo kuzisu zakuqala uthole udade etshitsha abafana sengathi ngumtshayeli wegandaganda etshitsha amagiya kucandwa umgwaqo ewatheni.

Ekukhuleni kwakhe umntwana kuyamlimaza emoyeni ikakhulu ungamfihlela ayokuvumbulula sekulaphaya.

Akulanto ebuhlungu njengokwaziwa kuthiwe unguMpangazitha wena usazi ukuthi ungu Dauramanzi.

Abanye ngabanika abantwana izibongo ezingesizabo ngoba kulandelwa inotho ukuthi sibikwe kuhwayibhetshu isisu kwaliwe kuqanjwe isinothi avume umuntu wenkosi.

Kwesinye isikhathi uyathi sewenze ubutshapha uqambe lapho othanda khona azalwe umntwana agule angapholi uzuliveze iqiniso ngoba inyoka zomdeni zisala ukuhlangabenza ilunga ezingalaziyo.

Kwesinye isikhathi omunye uqala ukuhlupha esekhulile esebizwa zinyoka zakibo. Bodade singabadobha emadamu kumbe ngaphi kodwa okusemqoka isibongo sakhe kumele abesazi kumbe uyise uyavuma loba esimba phansi.

Kwake kwatsho umdala wami uDlomo wathi yikho inengi labantu banamhlanje bengelayo inhlonipho wena uyakuthi ulaya uNdlovu kanti ukhuluma loMoyo.

Ayixabene.
Mehleli nkunziyembongolo Dube 0738305027

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds