uMthunywa
IMPILO yakulezinsuku isiguqukile. Ukusebenza sokuphenduke kwaba yinto engahlonitshwayo ngitsho ngumphakathi. Izisebenzi sezikhangelelwa phansi. Lanxa abathengisayo besithi abasebenzayo bangcono ngoba ekupheleni kwenyanga bathola imali yabo iyisigaqa, abasebenzayo bona bathi abathengisayo bangcono ngoba bona imali bayithola nsuku zonke njalo kayaleli emabhanga kukanti futhi ayihletshunwa bebhadala indleko ezifana labo “tax”.
Phela ekuthengiseni akulula, sokumele uphathe amakhasimende akho njengenkosi eziphathwa ngesizotha langobunono, ukwenzela ukuthi kusasa baphenduke njalo bezothenga. Nxa ungaphathi kuhle abathengi bayakubalekela, badinge omunye ozabaphatha ngesandla esibuthakathaka.
Le yinkulumo esibe layo labangane bami siqathanisa impilo ephilwa ngabasebenzayo, labangasebenziyo labaphila ngokuthengisa. Kunzima kuleli, ilizwe selaphenduka laba ngokunye, lokungani kuhle kwezulu kwenza isimo sabalukhuni ngamandla.
Ye, izolo ukusebenza bekuyinto efiswa nguye wonke umuntu ofundayo, ngoba ethi ufuna ukuba yilokhu lalokhuyana. Bekukuhle ukusebenza njalo usenelisa ukwenza okufunayo. Lamhlanje inengi labantu abasebenzayo selaphenduka inhlekisa, ngoba kungaholwa lutho emankampanini amanengi, njalo lezisebenzi ziphathwa ngochuku kodwa ukuthi zikhalale umsebenzi kungavumi ngoba umuntu ekhumbula ukuthi abantwana uzabathini.
Kithi abansundu osebenzayo unakekela phose imuli yonke okugoqela abazali, abazukulu kanye labanye abaphenduka ngekhaya ngoba lapho akade bekhona sokunzima.
Izolo izisebenzi bezizigqaja, ziziqhenya njalo zilegunya lokuthi uyakuthi esethatha umhlalaphansi aphiwe amaqubaquba, aqalise impilo entsha. Lamhlanje uqhatshwa uyize uphume umsebenzi ulokhu ungelakho ongaziqhenya ngakho empilweni ngaphandle nje kokuthi wenelisile ukufundisa abantwabakho, lakho uyabe ubulume ngamazinyo ukuthi ukwenze lokhu ngoba umkhonomi umubi.
Phela nxa usebenza ungahlala phansi uzibuze ukuthi eminyakeni embalwa edluleyo wenzeni, uzafica ukuthi akula lutho ngaphandle olukhulu olwenzileyo ngoba lemali oyiholayo yindibilitshi eyenela nje ukuthi ibhadale imali yerenti, ukugada kanye leyokudla ukudla lakho okungatsho lutho.
Ungabona osebenzayo ongathi uyaphumelela uhle wazi ukuthi kukhona okunye akwenzayo ngaphandle kokusebenza. Abanye ngabatshontshayo emsebenzini, lakho okulakho ukubaxotshisa imisebenzi.
Ngobuncane beholo lezisebenzi inyanga ithi isiyaphela uyabe usuboleke weqa ngale kweholo bathi besiza ukuzothatha imali yabo mhla besizwa ukuthi uholile, uthola sebevule amehlo angani yinkomokazi engasaboni nkonyane lapho etshiye ilifihle khona, selivuke lalandela umhlambi ongayisiwo.
Ayisikho ukuthi umuntu uyabe engafuni ukubhadala kodwa ontanga bathi azihlangani. Asizwelaneni njengabantu, olemali yakho mbekezelele ngoba kwamanye amankampani isimo sibi, akuholwa kodwa abantu bavuka nsukuzonke besiya khona emsebenzini.
