uMthunywa
Isitshebo sadabuka siduba ngitsho lakubokhokho bethu. Lalamuhla lokhu indaba yesitshebo imi ithe mpo, kanti isitshwala sikhona. Njengoba zingasalali ngempondo lezifuyo zethu.
Ngokunjalo izitshebo esaziphiwa nguNkulunkulu zikhona esinye sazo libhobola. Ngizakutsho ngamafitshane ngalapha ibhobola elivela khona, sonke singabalalo ibhobola.
Qala ngokuhlanyela intanga zamathanga ekusewuleni kwezulu atshi ngesikhathi somqando. Intanga lezi zikhula ngokuphangisa zinabe zikhuphe imikhwane emide. Ngemva kwamaviki athize zikhuphe amaluba. Wena-ke yiso isikhathi sokuthi ukhe imibhida yazo.
Yona okuthiwa libhobola. Khana imikhwane utshiye imilibo kukabili ukulungisa imibhida le, konke yikuqala ngokuyihluba iminxeba uyisike uyipheke kumbe uyichaye yone uzabe uyidla nxa ingasekho emasimini yakho.
Nanzelela ukuthi kudliwa imibhida ibhobola, kudliwe lamathanga avela kumibhida yebhobola. Lamuhla-ke mina ngizakhuluma ngezitshebo zebhobola elimanzi lebhobola elomileyo zoinke ziyizitshebo.
Ibhobola elimanzi
Okudingakalayo
Isixha semibhida yentanga zamathanga inkhwane ehlutshiweyo iminxeba
Ulaza – cream
Idobi
Imajarini kumbe njalo amafutha lamatamatisi
Ibilebile kumbe i-pepper
Imbiza lengqamu
Isawudo lephini
Uchago kumbe amanzi
Itshukela ngokuthanda
Ukupheka
Qoba isixha semikhwane ehlutshiweyo uyenze incezu ezincinyane
Gezisa kanenginengi ize iphele inhlabathi
Faka imibhida embizeni
Thela amanzi amalutshwana kumbe uchago
Yekela kuxhwathe okwemizuzu emihlanu
Phendula ukhame amanzi wonke
Yekela amanzi atshe lochago
Faka ulaza lesawudo
Xhoxhoza uphenduphendule
Faka ibilebile kumbe i-pepper
Kusekuthandeni endaweni yolaza (cream) ungafaka idobi kumbe imajarina kumbe njalo amafutha
Faka amatamatisi ngokuthanda kwakho
Yekela kuxhwathe okwemizuzu emine. Dlana lesitshwala ukholise.
Ibhobola elomileyo
Okudingakalayo
Ibhobola elomileyo lamanzi
Ulaza, imajarina, uchago lephini
Isawudo, ipepper lembiza
Amafutha idobi
Amatamatisi
Ukupheka
Pheka ibhobola livuthwe okwemizuzu elitshumi
Khathesi zikhethele ofisa ukukufaka ukuthi kuduhele imibhida yakho, kungaba lulaza, majarina, idobi, amafutha ndawonye lamatamatisi.
Pheka wena njengesifiso sakho kuze kuvuthwe.
Ukudliwa
Yebo kambe kudliwa lesitshwala kodwa kungadliwa lerayisi, macaroni, amatshakada, lenyama lamagwili. Wena dlana uzikholisele ubumnandi besitshebo sebhobola; Imibhida yamathanga. Asikho isitshebo “Ngamanga sikhona”.
