uMthunywa
NANZI impukane zibhuza emkulwini, phela emkulwini kulapho okuhlala khona ukudla njalo kulapho okulungiselwa khona ukudla. Kuyadingakala ukuthi kuhlale kuhlanzekile kakhulu kungaphaphi ngitsho lempukane eyodwa.
Ukudla konke osokonakele njalo kulephunga elibi kungabikhona emkulwini ngoba kubiza impukane. Konke ukuhlanzeka kukamama kubonakala ngomkulu (kitchen) wakhe. Ungezwa abantu besenyanya ukudla kwakho, besithi ulitshapha lempela zihluze ugcine umkulu wakho uhlanzekile kokuphela kungabonakali ngitsho leyodwa impukane iphapha.
Nansi-ke imithetho engakuphathisa ukuba uhlanzeke kokuphela ekuphekeni ukudla kwakho lokuthi umkulu wakho uhlale uhlanzekile ube linina eliziqhenyayo elingathandi ingcekeza njalo eliphatha zonke eziya emlonyeni zihlanzekile.
Amacebo okuhlanzeka.
1 Hlala uhlanzekile wena ngokwakho emzimbeni lezigqokweni.
2 Gcina umkulu wakho uhlanzekile. Thanyela ukorobhe phansi nsuku zonke. Gezisa amakhabothi lamashelufu akho uthanyele phansi ngemva kokupheka.
3 Geza izandla ngasosonke isikhathi ungakalungisi ukudla. Ugeze izandla nxa usuka kusambuzi. Hlala ulesifinyo kumbe ilembu lokwesula.
4 Gezisa izitsha zakho zokudlela ngesepa yokugezisa lange vimu (scouring powder) kufe wonke amajemusi
5 Ukudla okusele kudliwa kugcine efirijini kumbe endaweni eqandayo kuze kungabi lempukane lamawuwu emkulwini wakho
6 Gcina iziko lakho lihlanzekile ngaso sonke isikhathi, loba yisiphi isitofu opheka ngaso.
7 Amalembu okugezisa lokuthawula kumele ahlale ehlambulukile, watshuke ngaso sonke isikhathi
8 Ungasebenzisi isepa elephunga emkulwini kumbe ukugezisa izitsha, izandla ngoba kungenza ukudla kunuke.
9 Kulabantu abangadliyo okunye ukudla, nanzelela ukuthi imbiza opheka ngayo lokhukudla uyayigezisa yodwa emanzini akhudumalayo ngesepa (dish washing liquid).
10 Ungabilisi uchago ngembiza obupheke ngayo uhanyanisi loba inhlanzi.
Nanzelela lokhu nxa upheka
1 Bona ukuthi ukudla okuphekayo akonakalanga, okunye kuyabhalwa isikhathi sokulunga kwakho.
2 Yesula inyama ngelembu elimanzi ungakayipheki.
3 Gcina inyama efirijini ukuba ingonakali
4 Qobela imibhida epulankeni.
5 Gezisa imibhida ungakayipheki.
6 Faka isawudo kumbe itshukela elilingeneyo ngoba konke kubanga imikhuhlane.
7 Hlala ulomuthi wokubulala impukane, amawuwu lamagundwane emkulwini wakho.
8 Gcina umkulu wakho uhlanzekile ukuze abantu balangathe ukudla kwakho njalo baphephe emikhuhlaneni eminengi ebangelwa yingcekeza lobutshapha. Hlanzeka wena ngokwakho.
