uMthunywa
YiNtatheli kaMthunywa
KULABOWINDI benye ibhasi yakoBulawayo abagwaze enye indoda esilindweni samabhasi eGokwe yafa kubangwa intombi.
Isiga lesi senzakale kuviki edluleyo lapho uMakhosi Mangena oleminyaka engu-29 yokuzalwa loLobukhosi Gumede oleminyaka engu-31 yokuzalwa abagwaze enye indoda eGokwe bebanga intombi qede badliwa ngumswenya.
UMthunywa ukhulumisane lomfakazi ongathandanga ukubethwa ngegama obike ukuthi amadoda la angowindi athelela umuyi bemsola ngokuthandana lentombi yomunye wabo.
“Owindi laba baqala ukuxabana londoda lo bebanga intombi ababeyibone eMateme Business Centre. Owindi laba bagwaza undoda lo ngemva kokumbona ekhulumisa intombi okukhanya ibithandana lomunye wabo,” kuchaza umfakazi lo.
Uqhubekele phambili esithi bathi beqeda ukugwaza indoda le bangena kwenye ibhasi eyayisiza koBulawayo.
Kubikwa amapholisa ancwetshwa indlebe ngesinye isihambi esasisebhasini le okwenza owindi laba babotshwa.
Isikhulumi samapholisa uChief Inspector Precious Simango uvumile ukuthi udaba lolu baluthola njalo owindi laba babotshwa.
“Owindi laba babulala umuntu lo eGokwe baqeda bagada ibhasi eza koBulawayo, omunye owayesebhasini wabikela amapholisa angapha yikho ukuthi babanjwe basiwe enkambeni eseMzilikazi lapho ababuyiselwa khona futhi eGokwe,” kuphetha uChief Insp Simango.
