uMthunywa
Yintatheli kaMthunywa
UMQEQETSHI wenguqu uLuke Masomere usecele amakhansila eZimbabwe Football Association ukuthi afunde ukuvotela inkokheli ezilolwazi ngomdlalo hatshi abantu abafuna ukwenza imali ngebhola.
UMasomere uthe kasoze ahlaliseke nxa iZifa ingakhokhelwa yilabo abalande ukuzochitha isikhathi kulokuthi baphakamise ithalenta lomdlalo kuleli.
Umqeqetshi lo ubuze ukuthi kungani abantu bedidizelela ukuvotelwa kuZifa endaweni yokuthi bayedinga izikhundla kwezinye inhlanganiso.
Ekhuluma loMthunywa kuliviki, uMasomere kazange afihle ukuveza ukuthi okubulala inguqu yeZimbabwe ngamakhansila angenisa abantu ezikhundleni. Uthe kuminyaka emibili elandelayo inguqu yakuleli izaguquka iyephambili nxa kuvotelwe inkokheli ezilolwazi.
Amakhansila eZifa angamatshumi amahlanu lane azadibanisa amakhanda mhlaka 5 kuMpalakazi lapho okuzakhethwa khona umongameli lomsekeli wakhe kunhlanganiso le. Kuzakhethwa njalo lamalunga ebhodi.
Kubaqeqetshi bonke, uMasomere ngowakuqala ukuphumela egcekeni ebika ngokhetho lolu olusemlonyeni yabanengi.
“Akungene umuntu okhanya elesimilo emphakathini. Phela kulabanye abagijimisa ukuzotshaya amangqetshane emahofisini eZifa, bengazi lutho ngomdlalo wethu.
“Kanti ukudidizela kubangiswana isikhundla seZifa ngokwani? Zikhona njalo zinengi inhlanganiso ezidinga inkokheli, kodwa wonke umuntu ufuna ukungena kuZifa. Sesidubeke kwenela ngeZifa le epheka imboza sonke isikhathi,” nguMasomere lo.
UMasomere ukhulume kanje echothoza ukulwisana kwabosomabhizimusi kukhetho lweZifa. Kubosomabhizimusi abafuna ukuvotelwa kuloPhilip Chiyangwa, uTrevor David Carelse Juul abafuna isihlalo sikamongameli. Omunye nguOmega Sibanda okhankasela ukuba ngumsekeli kamongameli.
ULeslie Gwindi owake waba ngunobhala wePremier Soccer League loJames Takavada labo bancintisa esikhundleni sikamongameli.
