uMthunywa
Msilisi Dube loCornelius Luphahla
KULAMADODA amabili ahlala elokitshini leNkulumane, koBulawayo okubikwa angqikilane kwaba luthuli ebanga ukukhutshwa kwabondofa okubikwa ukuthi sebebhahile kuleli lokitshi.
UMidlot Mthombeni kunye loJosphat Moyo okungasatholakalanga iminyaka yabo yokuzalwa kubikwa babhuqane kabuhlungu ngeSonto kuyonale iviki ntambama.
UMthunywa uzwe ukuba kulabondofa asebedlisa izakhamizi zakuleli lokitshi imbuya ngoluthi nanko phela bajikijela abantu ngamatshe babuye babatshisele impahla ezindlini.
UMnu Mthombeni ulandisele iphephandaba leli ukuba okwabangela ukuthi balwe yikuthi uMoyo wala ukuba babonisane ngokukhitshwa kwabondofa laba ngakho wasecabangela ukuba ngabakhe.
“Ondofa laba sebetshaya abantu ilanga libalele ngakho akusahambeki emgwaqweni kungakho abantu sebesesaba ukuhamba ngitsho lemini. “Safika ezindlini lapho okwakuhlupha khona ondofa laba ngazama ukubonisana labo ngokuthi kudingwe abantu bezohlanza izindlu lezi kodwa uMoyo wala.
“UMoyo wala ukuthi ondofa laba bakhitshwe ngasengicaphuka ngoba sengicabangela ukuthi ngabakhe. Lokhu kwabangela ukuba sicine sesisilwa,” kuchaza uMnu Mthombeni.
UMnu Mthombeni uqhubekele phambili wathi ulesifiso sokuthi ondofa laba bakhutshwe kodwa uMoyo kukhanya akumphathi lokhu .
“Ondofa laba babulala amafasitela ezindlu ezintathu. Indlu yangakibo yatshaywa ngakho lempahla ezaziphakathi zatshiswa kodwa yena wala ukuba sidinge abantu abazabakhipha,” kuphetha uMnu Mthombeni.
Esinye isakhamuzi esingathandanga ukuziveza sithe uMnu Moyo wagijima waya emoteni wabuya ephethe inkalakatha yomhedla efuna ukugwaza uMthombeni ngawo ngenxa yabondofa laba.
UMthunywa uxhumane lodadewabo kaMoyo uNkosazana Sibonginkosi Moyo wachaza ukuba yena lomfowabo kabaloyi.
“Abantu abanengi bacabangela ukuba ondofa laba ngabethu kodwa thina kasiloyi. Lathi siyafisa sibili ukuba ondofa laba bekhutshwe ukuze sihlalisane. Umfowethu kahlali lapha uhlala elokitshini leCowdray Park.
“NgeSonto ekuseni ngathi ngisemhlanganweni ngabizwa kwathiwa ondofa laba basebelumathise impahla zonke endlini. Ngikhuluma nje ingubo zatsha zaba ngu-8. Sesithwele amagabha avuzayo ngondofa laba,” kulandisa uNkszn Moyo.
UMnumzana Gedion Mangena ongukhansila kulelilokitshi uthe ondofa laba badla ubhedu ngakho kufuneka abaphurofethi abaqinileyo ukuba bezobakhipha.
“Ondofa laba sebexabanisa izakhamizi ngakho kumele bakhutshwe masinyane. Sesikhulume lamalunga ebandla lePostoli kunye lamaZayoni ukuthi bebuye bezobakhupha.
“Ngokuzwa kwami ondofa bakhona kukhanya bayahlukumeza sibili okuzwayo ngakho labo abazakhipha ngibatshele ukuba babuye beqinile,” kulandisa uMnu Mangena.
UMnu Mangena uqhubekele phambili wathi ondofa laba bathela omunye umntwana ngenhlabathi ebusweni okwenza kubenzima ukuba abone kuhle.
“Ondofa laba bazakhutshwa ngeSonto ngoba lamapholisa avumile ukuba bakhitshwe. Mina ngifisa ukuba izakhamizi zihlalisane kuhle hatshi ukucabangelana okungayisikho. Ukucabangela umuntu ukuba ulabondofa kulicala ngakho kumele sihlalisane kuhle njengezakhamizi,” kuphetha uMnu Mangena.
