uMthunywa
YiNtatheli kaMthunywa
BATHWELE amagabha avuzayo omama beZezani eBeitbridge nanko phela bakhala ngokuhlukuluzwa emacansini yilokhu abakucabangela ukuthi ngondofa.
Insindabaphenduli le isilezinyanga ezimbalwa isenzakala lapho endaweni le sekulobamama abambalwa abakhonona ngemizimba evuka ibuhlungu kanti lezitho zabo zangasese ziyabe zitshengisa ukuthi kukhona obekusenzakala.
Ekhuluma lentatheli omunye wezakhamizi zakule indawo uNkosazana Phiona Sibindi uchaze ukuba bathwele nzima ngabondofa laba.
“Ekuseni uvuka iqolo libuhlungu okumuntu obesebenza okuzwayo okocansi kodwa ubaba engekho. Kwesinye isikhathi uyabe ungani uyaphupha umuntu ongubaba ekubamba ekuphulula kanti yikho okuyabe sekuzitholele umfazi,” kubika uNkosazana Sibindi
Uqhubekele phambili echaza ukuba omama abanengi esigabeni bathwele nzima ngokuhlukuluzwa ngokucatshangelwa ukuthi ngondofa emacansini.
“Udaba lolu salubika kuzinkokheli zadinga inyanga yikho lapho okwaphuma khona mgceke kuzikhulumela kuthi khona kwancitshwa umfazi yikho bekuhamba kuzitika kubomama abangalamadoda,” kubika uNkosazana Sibindi.
Iphephandaba likazulu likhulumisane lomunye umama ohlala kule indawo uNkosazana Sethule Ndlovu ovumileyo ukuthi kulezinto ezazikhathaza esigabeni.
“Mina ngangimangala ukuthi yindaba umuntu evuka umzimba ubuhlungu ediniwe kanti kulabondofa abasenza abafazi. Abantu bayaganga uyadinga umuthi eyedwa nxa sokuhlupha sekwekela kusabalale iganga.
Lowakukhuphayo kazange achaze lokuthi umnikazi ngubani.
“Kulezinsuku siyaphumula lokhe kwakhitshwayo asazi kumbe kuzaphenduka kodwa amalanga la sizilalela kuhle imizimba ivuke ingadinwangwa,” kuphetha uNkszn Ndlovu.
