uMthunywa
ZiNtatheli zikaMthunywa
ZIKHUZA imihlola njalo zididekile izakhamizi zelokitshini leSizinda edolobheni lakoBulawayo ngemva kokuba esinye isalukazi sakule indawo sidele indlu yaso sayahlala “esilugwini” senkukhu sisithi endlini yaso akulaleki.
Indaba le kubikwa silesikhathi eside isenzakala nanko phela uNkosikazi Beatrice Msunza kubikwa sowadela indlu yakhe ebucwadlana khonapho eSizinda, ku7946/5 wayahlala kumntanakhe uNkosazana Rosa Msunza okuyikho alala khona emoteni esiyisilugu senkukhu ethi uhlutshwa ngumatholwane okucatshangelwa ukuthi ngowakhe.
UMthunywa uzwe ukuthi phakathi kwamabili uNkkz Msunza uyaphuma endlini athi akulaleki ayelala esilugwini.
Ekhuluma lentatheli uNkosazana Mildred Nkomazana oyisakhamuzi sakule indawo uthe indaba le uyayazi njalo kalankani ngayo.
“Mina indaba kaMsunza eyokulala kwakhe emoteni lenkukhu ngiyazi mhlophe njalo ngilobufakazi ngayo. Ngitsho ngoba ngaqalisa ngimuzwa ekhuluma ebusuku nsukuzonke ngaze ngabikela umakhelwane wami laye wathi uhlala emuzwa.
“Kwathi mhlalokho eseqalisile ukukhuluma ngafonela umakhelwane wami savuka sambona esiyangena esilugwini ethi endlini akulaleki. Kusasa kwakhona wonke umuntu wavuka ekhuluma ngaye ngoba wayekhulumela phezulu yikho abantu bonke bamuzwa. Ngikhuluma nje lakhathesi uyakwenza lokhu,” kulandisa uNkszn Nkomazana.
UMnumzana Ben Moyo oyisakhamuzi sakule indawo uthe uNkszn Msunza usesiyahlala eHarare ebalekela umatholwane wakhe.
“Ugogo uMsunza lami nginje ngiyakwazi ukuthi uhlutshwa ngumatholwane wakhe seze sebaleka uthi sesiyahlala eHarare. Ngokunjalo endlini yakhe utshiye umzawakhe kodwa laye kangikholwa ukuthi uzenelisa ukuhlala,” kutsho uMnu Moyo.
Indodakazi kaNkszn Rosa ibuzwa ngale indaba ithe kayazi lutho ngakho unina kufanele azikhulumele.
“Mina indaba yokuthi umama uyaphuma endlini ethi akulaleki uhlutshwa ngumatholwane kangiyazi, kungcono ubuze yena azikhulumele ngoba kimi ubuya ezongivakatshela kodwa ulendlu yakhe,” kutsho uNkszn Msunza.
UNkkz Msunza ebuzwa ngale indaba walile ukuthi uyayazi wathi yena ulendlu yakhe njalo abantu bambangisa ukuthi ulenkukhu ezinengi njalo uzidla yedwa.
“Abantu balamanga ukuthi ngilala emoteni lenkukhu njalo bangibangisa ukuthi ngilenkukhu ezinengi futhi ngiyabancitsha nxa ngizihlabile. Okunye njalo mina ngilendlu yami ngakho lapha ngiyabe ngivakatshele umntanami okuyikho engifuya khona inkukhu zami.
“Ngabe uphuzile ukubuya ubuzangiswela ngoba ngifuna ukuya eHarare,” kuphetha uNkkz Msunza.
