uMthunywa
UBULELE ingane eleminyaka emibili yokuzalwa engudadewabo ngesando yahle yafa omunye umlisa we Mqobokazi, eHluhlulwe kweleSouth Africa ngoba esola ukuthi ufike endlini elambe engazazi kodwa watshelwa ukuthi besokuphekwe isitshebo amanzi esitshwala awakafakwa.
UMnumzana Sithembiso Mthethwa (35) obotshiweyo usesitokisini khona manje njengoba eke wavela emthethwandaba kamantshi weMtuba kwathiwa ayehlolwa ingqondo.
Kuthiwa lesi sehlakalo sokubulawa kukaQhawekazi Gumede (2) esitshaqise umphakathi, senzakale phakathi kweviki edluleyo.
Ngokuthola kwephephandaba leSolezwe ngeSonto lindoda itshele amapholisa abelande ukuzoyibopha ukuthi ibixabene lalengane eleminyaka emibili, yikho nje iyitshaye ngesando.
UNkosazana Londiwe Msane (19) olilunga lomdeni ebelikhona kusenzakala lesi sehlakalo uthe, uzayixoxela amagwababa echobana into ayibona ngosuku lwesehlakalo.
Uthe uSithembiso wafika elambe ehanqaza ephuma engena evula amabhodo efuna okudliwayo kodwa kwalandulwa kwathiwa kusaphekwe isitshebo isitshwala sisakhatshana.
UNkszn Msane uthi yaqala lapho-ke inkinga ngoba uSthembiso wavele waphuthuma kwenye indlu ekhabothini, wabuya lesando ethukuthele esidla amalangabi.
“Ingane yayidlala emnyango wasemkulwini ingatshongo lutho kuye wafika wayitshaya ngesando esiphundu kabili, yawa khona lapho.
“Ngathi ngiyasondela wayiphinda okwesithathu eyitshaya ngamawala. Yathathwa iphuthunyiswa esibhedlela amehlo ayo esemhlophe, ngiyasola yayivele isitshonile,’’ kusho uNksz Msane.
Uthe lo mlisa ngesikhathi egila lesi siga wayengatsho lutho, wayeyigqema nje ingane ebonakala ukuthi ugcwele intukuthelo. Kuvele lokuthi lumlisa ugila lo mkhuba nje, ubelezimpawu zokuthi ingathi ulahlekelwa ngumqondo. Kuthiwa ubesenza lezinto ezixakile ekhuluma into engahlangani ethi uwine i-lotto kanti usenga ezimithiyo.
Kuthiwa ubebuye acatshe egangeni uma ehlangana lamanye amalunga omdeni, kungaziwa ukuthi ucatshelani.
Ngesikhathi leli phephandaba lihambele lumdeni isimo besimunyu kubonakala ukuthi kusekude ukwedlulisa lesi sehlakalo.
Unina wengane ebuleweyo uNkosazana Nobuhle Mlambo obesahleli emsamo ezilele ingane uthe, kenelisi ngitsho lokukhangela isithombe sendodakazi yakhe ngendlela okubuhlungu ngayo.
“Asifuni ukuphinda simbone lumuntu owenze le nto futhi kufanele ahlolwe ingqondo ngoba kuyacaca kukhona okungahambi kahle kuyena. Besibona ukuthi uqalwa ukugula kodwa singanaki besingazi ukuthi angenza unya olunje,” kubalisa uNksz Mlambo.
Okhulumela amapholisa KwaZulu-Natal, uLieutenant Colonel Thulani Zwane, usiqinisekisile isehlakalo lesi wathi umsolwa ushaqwe ezakwadalawane emuva kwesigameko wathweswa icala lokubulala.
