uMthunywa
Ophezulu Stinta – Kundatshana elesihloko Ukholiwe? Sitshiye uKholiwe exakwa yikufika kuka John ngakibo. Akukho ke yena ayekubona kumhlanganisa lo John lo ngoba wayesemehazele ukuthi yena wayesekhethe yiphi indlela. UJohn lapho ebona uKholiwe esiza wavele nje yena wamkhanga ngobuso obumamathekayo. UJohn lo kucaca wayeyinsizwa engancomekiyo ngokudalwa nangu nje wayebonakala ngamazinyo ukuthi ngumuntu.
Babingelelana labababili. UJohn kazange nje aphozise amaseko. Wambuza uKholiwe ukuthi kutheni nje wayengaphenduli incwadi zakhe. Wabuya njalo wagcizelela ukuthi yena wayelokhu emi ngelifanayo ngesicelo sakhe kanjalo nje yikho wayezinike ithuba wasuka khonale ko Nongoma kude ezodinga umuzi wako Kholiwe koMashu wawuthungatha waze wawuthola. Wayelandela umkhondo wencwadi zakhe.
Lapho uKholiwe wavele nje waphendula ngelipholileyo. Wamazisa uJohn ukuthi yena wayesehamba ngenye indlela waye sewaguquka kudala kule yandlela ayemazi ngayo ngesikhathi besesikolo. Wabuye wamcela nje ukuthi ehlukane laye phansi ngoba yena wayesezimisele ukugana ngase sontweni hatshi laba abasahamba ngezonhlaba njengaye uJohn lo. Esizwa impendulo ayengayilindelanga uJohn wethuka ngokungakholwa lokho ayekuzwa.
Kazange nje athande ukuba mude uKholiwe wamvalelisa uJohn waze wamxhwayisa ukuthi kathandi kudala ingxabano phakathi kwabazali bakhe ngokuba elokhu emi esangweni laye. Wafulathela waqonda endlini yakwabo. UJohn wambuka efulathela lapho sengathi wayenyathela phezu kwenhliziyo yakhe.
Isenzo sika Kholiwe esifana lalesi siyingcazela yesimilo esincomekayo emuntwini wesifazana loba intombi esakhulayo. Ijaha akubukeki ukuthi lapho liphosa ilizwi ihle nje ithole impendulo eliyikhangeleleyo kanjalo nje kuyalulazeka lokho.
UJohn wazama ukuthi bakhulumisane kodwa-ke uKholiwe wayeqedile ekukhulumeni lapha. uJohn wafikelwa ngumcabango wokulandela ayezithela endlini avele nje azibike mathupha ebazalini lapha. Wangena emoteni engadlanga ngotshana lapho wabetha ihuta kabili ezama ukubiza uKholiwe. Konke lokhu kwabayize nje. Wabona kungcono angene ayebuye ngayo. Endleleni lapha wayezibuza imibuzo eminengi ngokuzama kwakhe okungaka.
