O-Level: Ukuhluzwa kwengwalo

28 May, 2015 - 09:05 0 Views
O-Level: Ukuhluzwa kwengwalo

uMthunywa

Ophezulu Stinta

Sikhangela indatshana elesihloko esithi sona Uhambo Olumnyama. Lapha sihlangana lendoda yase Thekwini ebizwa ngegama elithi Fanyana. Simthola ekhathazekile eseGoli engumuntu ozimisele ukuya ekhaya ngemva kokuthola ucingo olwaluvela kumkakhe ukuthi eze ekhaya ngokuphangisa. Lolocingo aluzange lubike ngitsho lesizatho ngokuphazima kwelihlo lwahle lwaqhamuka umlandu wasala ngakuye ke uFanyana, lowala ngitsho ezama ukuthi aphinde yena mathupha atshayele ekhaya kwaba lutho nje ukuthi ludojwe ucingo.

Yikho kanye okuhlasimulisa umzimba ukuthi ucingo lubuye lungadojwa ngaliphi ngemva kokubikelwa ukuthi aphangise aze ekhaya. Kungomunye lapha kwakumele nje kunuke santungwaa pho kuyini ayengakwenza lalapho eselensolo thize. Kwaze kwathi ngelikade ke sangena isitimela lapha esilindweni wangena laso saluqhuba uhambo lwaso ngokukhulu ukunyonyoba. Wayefisa ukuthi ngabe sasivuka ngesikhulu isiqubu uFanyana kodwa phinde.

Sashosholoza sihamba sisima kuzo zonke izilindo zesitimela. Uhambo lolu lwalu mjumile ngoba nje kwavele kwafika ucingo engelayo imali eyanela khona nje ukuthi aqatshe imota eyayizamfikisa masinyane, wayelemadlana eyanele sona isitimela kungasenani waziduduza ngelithi kwakuzathi kusisa nje abesefikile ekhaya eyokuzwa lesi simanga. Endleleni lapha wayehamba ebalisa asolele ogulayo njengoba wayelesifo esibi. Lokho kwakumtshayisa ngovalo.

Isitimela lesi saze safika lapho okwakumele ehle khona. Kazange aphozise amaseko wehla ngokuphazima kwelihlo wagada ibhasi eyayiqonda eXobho lapho ihola lesithathu lantambama laseledlulile kudala. Phezu kohambo lwakhe olumnyama wafika ibhasi eyiyo eyayizamtshiya ekhaya ngqo isiphumile. Okwasekumele akwenze kwase kuyikugada itekisi pho yona mali yetekisi layo wayezayidobha kobani. Wazama imota ezithize kodwa kwacaca nje ukuthi lapha emalini kwakungavunyelwana. Kwaze kwathi ekucineni wangena kwenye eyayizamtshiya koMagagula lapho ke kwamcacela ukuthi uhambo lolu wayezaluqedisa ngenyawo akukho nje ayengakwenza.

Ukugcwala kwayo imota le kwathatha isikhathi yena uqobo lwakhe uFanyana kunguye owayengasahlalisekanga, umtshayeli lo kwakungathi nje uzithathela isikhathi sakhe nango wake wathi nya engabonwa muntu lapho ayeseqonde khona okweside isikhathi.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds