O-Level: Ukuhluzwa kwengwalo

14 May, 2015 - 11:05 0 Views

uMthunywa

Silo Ophezulu Stinta
UMthunzi wayesethethe isinqumo sokuya bhekana lomfundisi emishini lapha ayobuzisisa kuye mhlawumbe nje wayengaba lempendulo kulegxaki eyayisithanda ukudunga impilo yakhe. Lakanye wenza njengendoda wayaqoqoda komfundisi lapho avulelwa khona likhosikazi lalapho ubuso lobu babeqala ngqa ukuhlangana labo.

Babingelelana kwasekudingeka ukuthi yena uMthunzi uqobo lwakhe azibike lokho ayehamba ngakho.

Wayetha inganekwane yakhe waze wayafika emaphethelweni. Umfundisi wambuza owodwa umbuzo owayidunga ngamandla inhliziyo kaMthunzi, lapho ethi…..kodwa mfowethu nawe usayilandela name le mali kusathane?

Kawukhohlwa ngani yiyo? p60

Wabona nje ukuthi umfundisi lo wayesezimisele ukumtshumayeza, into ayengayilandanga lapha. Wabona kungcono khona ukuthi ayebonana labaphathi bale imishini mhlawumbe babengaba lempendulo egculisa umoya wakhe. Ukusa kwangakusasa kwabonwa nguye, eselubhekisa kulabo baphathi. Lakhona wafika wayilandisa indaba yakhe. Lakhona wabuza ukuthi pho wayefuna ncedo bani.

Wakhalaza ngokuthi aluba wayengavunyelwa nje ukuthi agebhe lapho ayecabangela khona babengamvumela na. Umphathi wayesevele esebone uhlanya lwamampela, aze agcizelele ngelokuthi njengoba lesosihlahla ayesazi ngaso sezaganyulwa nje yinto eyayithiwani layo. Ekucineni kwakho konke umphathi lo wamlandulela ukuthi akukho sonto elalizagejwa kavele nje akhohlwe aphinde. Waphumela ngaphandle kwehofisi esejuluka wayezathini pho ngemali yakhe engaka ayiyekele nje mahlayana . Wafunga wagomela ukuthi lokho yinto ayengeke ayenze ngitsho.

Ngalobo busuku wazimisela ukungalali. Bathi nje beqeda ukudla wenza sengathi uyalala, kwathi nje phakathi kwamabili wayesemi ngazo zombili ehlome ephelele walubhekisa esontweni ethwele zonke izikhali zokugebha. Wayezimisele ukuya delisa umoya wakhe mhlawumbe wayengathola imali yakhe le.

Wafika lapha komfundisi sekulelwe kuthule cwaka wabona laye kulithuba elihle lelo. Wagqekeza ngasesontweni wangena wayekhanyelwa yisithunzi nje kwakumnyama tshu phakathi lapha. Wabona kungcono ukuthi aqonde ngqo endaweni kamfundisi.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds