uMthunywa
Ophezulu Stinta
Sikhangela indatshana elesihloko esithi umgodi. Kule indatshana sithola uMlinganiswa okhanya eqoqa impahla yakhe yonke okomuntu olohambo olude. Kungena uNondaba ofika abuzisise ngokuqoqa lokhu okukaHlomuka ebuzisisa ukuthi ngempela uyahamba umtshiya yedwa kule indlu.
UNgidi uyathutha ethuthiswa zindaba ezinhle, umfana wakhe okuthiwa nguSimanga wayesebuyile ekhaya, ubuya nje sengudokotela njalo eseyindoda lalapho umbuka. UZondi uyamjabulela omunye wakhe ngendaba lezi ezinhle kangaka. Uyaphumisela ngelithi asisekho isizatho sokuthi aqhubeke esebenza nzima lapha epulazini begijinyiswa lemigodi abangayaziyo. Baxoxa nje kuhlwile kusenjalo bephethe ngoPelepele lo obagebhisa imigodi bezwa ngezisinde wayeselapho ngasemyango. Wangena wakhwela ezehlela phezu kwalaba bobabili, ebabiza ngamakhanda angasebenzi kuhle. Wayebathethisela ukuthi wayezawenzani umgodi omncinyane ababewugebhile. Wabahalada ngelithi isikhathi sesiphelile okutsho ukuthi kwasekumele baphume ngalowomnyama bayegebha. Badobha amapiki loba nje basebezondile begane umnwabu balandela emva kwakhe uPelepele lo owayelokhu ebahola ngemhlamba.
Umbuzo omkhulu uthi umgodi lo okwakukhalwa ngobuncane bawo wawuzagqitshelwani kuwo okwaze kwenza uPelepele waphuma ngobusuku esiyadinga uZondi lo Nondaba.
Amadoda la ayezondile kodwa kusobala ukuthi akukho ayengakwenza. Bayatsho nje labo ukuthi babengeke bamqonde bemazisa ngalokho ngoba kuyacaca ukuthi umbhobho lo wayengawuzili ngitsho wayengachaphaza ubuchopho bendoda ngokuphazima kwelihlo. Bagebha waze wasuthiseka uPelepele owayelokhu ejeqeza inkombalanga yakhe. Wabamisa lapho esesuthisekile ngobude bomgodi lowo. Khonapho nje kwathutsha imota kuleyondawo, uPelepele ngokwakhe kwabanguye obonisa njalo eqondisa umtshayeli ukuthi leyo mota isondele kulo mgodi.
Kwehla amadoda amabili emoteni lapha amadoda abelungu baqonda ngemva kwemota lapho abakhupha khona umthwalo ocaca wawusinda okwamagama, bawuphosela emgodini lo owagejwa ngo Zondi. Besathithibele bebukele wakhwaza kwaba kanye uPelepele ebuza ukuthi kuyini ababekulindile bengagqibeli nje. UPelepele lamadoda abelungu babebukele beqhunsa uhleko bebhema benatha lotshwala. Ukwenza kwabo kucaca ukuthi kukhona ababekujabulela ngalolosuku. UNgidi lo Zondi basebemanzi te kungekho loyedwa owayebonakala besebenza nje.
Balala bedinwe okubuhlungu. UNgidi yena kazange abuquthe ngoba wayesethethe isinqumo sokuphuma kulobubugqili.
