uMthunywa
Ukuhlaziya izinkondlo kuyaqhutshwa
Ugqozi Lwezimbongi
Ziqoqwe zahlelwa nguP Mpofu
Ugwalo lwakhitshwa yiMambo Press ibambane le- The Literature Bureau
Imbongi nguNS Sigogo
Isihloko senkondlo – Impilo
Imbongi kule inkondlo iveza ukuqakatheka kwempilo yonale esiyiphilayo. Imbongi ithi impilo iyisibusiso uNkulunkulu asehlisela ezandleni zabantu. Into ephathelane loMdali uNkulunkulu iqakatheke kakhulu. Impilo yinto egcwele umhlaba wonke yikho nje imbongi iyibiza ngokuthi yintengantenga yomhlaba. Iqakathekile kakhulu impilo okwenza uNkulunkulu wayethesa umqhele wegolide wayembathisa ngengubo emhlophe.
Impilo le yenziwe samuntu ngoba nanku yetheswe umqhele samakhosi omhlaba. Izandla lezinyawo lazo ngokufanayo kwezamakhosi zahuqhwa ngesiliva zaba mhlophe. Impilo le samuntu ihlabelela izungeze umuzi, kuthi lapho enze khona lokho bayithakazelele santombi lejaha nxa umthimba wabo ungena ekhaya. Ngenxa yokuqakatheka kwempilo imbongi ithi ubusisiwe lowomuntu impilo esothe emagumeni akwakhe. Kuvele kunjalo wonke umuntu uyayithakazelela impilakahle. Wonke umuntu uthanda ukuba lempilo.
Siyezwa njalo enkondlweni lapha ukuba impilo iyinjabulo yabayanga, abaswelayo. Iyisaneliso sezilima lezigoga kanti lezikhulu lazo ziyayikhalela impilo. Kakho ongafuniyo ukuphila yikho nje ikhalelwa nguye wonke umuntu. Kuhle emakhaya abantu ukubona abantwana babo beyeqayeqa bejabula kakhulu. Lokhu kuveza ukubakhona kwempilo. Okungelampilo khona akulakuthokoza kumbe ukujabula.
Imbongi ibeka lokhu ngalamazwi: “Kuhl’emakhay’ethu, ukubon’inganyana zethu, zitshakala samathole lisina.” Nxa izulu lisina utshani bubunengi inkomo lazo ziyazala ngobunengi. Amathole ayamunya kubonina asuthe emva kwalokhu agijime etshakala etshengisa ukuthi aphile kahle. Atshengisa ukuphila ngalokho.
Abantwana labo nxa betshakala betshengisa ukuthokoza kwazise impilo isabathanda abantu. Ukuthokoza lokho kutshengisa impilakahle ekhona kulelo khaya. Impilo iyabe ibona imimango lezithiyo zakoKufa ukuthi kazifinyeleli kulowo muzi okukhona injabulo ngaleso sikhathi. Kuhle kulowo muntu ozelwe ephila ngoba kubalenjabulo enkulu kuleyo muli. Ngakwelinye icele kubi kakhulu kozelwe efile ngoba engelakukubona ukwamukwa leyonkezo yegolide emlonyeni wakhe.
Ubuso bempilo buyaziwa ngoba lapho ekhona kulenjabulo. Wonke umuntu uyayifisa impilo engayikhanuki ngoba ukuswelakala kwayo kakukuhle, kuletha usizi olukhulu ekhaya. Kuba lokudana lokukhala okukhulu.
“Uvalelisa kube mnyam’ekhaya.” Ukungabikhona kwempilo kwemuka abantu yonke injabulo, intokozo, kubalethele izinhlupheko. Imbongi ithi kubo njengezidalwa, koSidalwa kuligugu ukotha lempilo. Lapha itsho ukuthi kuzidalwa ezingabantu kuligugu ukuba lempilo.
Nxa impilo ingasekho kuthi kabavale iminyango yezindlu bengasazi abakwenzayo, nxa impilo isiphuma kusihlobo sabo sesisifa. Impilo iyabe isimtshiya ihamba sekusiba lokudana lokudidana ingqondo abantu sekungathi baphambene bengasazi labakwenzayo.
