uMthunywa
Charles Dube
Ukuhlaziya izinkondlo kuyaqhutshwa
Ezivusa Usinga luqoqwe lwahlelwa yi-Literature Bureau lwakhitshwa yiMambo Press
Imbongi nguEngelbetter Ncube
Isihloko senkondlo – Phumula mnakwethu ekuphumuleni
Imbongi kule inkondlo ikhuluma ngomnakwabo, kumbe isihlobo esiseduze kakhulu layo osebhubhile, ongasekhoyo. Usefile lo umnakwabo kodwa yona ithi kaphumule ekuphumuleni, ekufeni lokho. Kunjalo ebantwini ukuthi bathi lowo osedlule emhlabeni useyephumula. Osekusele yimicabango kumbongi ngalowo mnakwabo.
Kusele imicabango ekhanda lembongi icabanga ngomfowabo lowo osedlule. Ixotsha yonke imicabango engabe imthiya kwelakhe ikhanda athathe ithunzi lomnakwabo alibeke kweyakhe inhliziyo. Ngenxa yokucabanga ugcwala usizi emkhumbulweni yakhe, ekhumbula ngaye umfowabo. Imbongi ikhumbula zonke izinto kanye lemisebenzi ababeyenza bonke njengabantu bebanga linye, abakhule ngasikhathi sinye.
Imbongi lomfowabo lo babesotha bonke umlilo, besiyakukha bonke amanzi. Babesiyatheza inkuni bebonke. Babedlala amadlwane bonke lesikolo babefunda bonke. Lamhlanje usefikelwe yikumangala okukhulu ngoba usesele egcekeni, umfowabo usedlule kulumhlaba, kasekho. Usizi lokutshiywa ngumfowabo lo lubakhona ngamandla nxa ekhangela ithuna lakhe umfowabo, embona ethule zwi ngoba vele ithuna kalikhulumi. “Usizi luba khona ngamandla, lapha ngibhek’elakho ithuna, ngikubon’uthule wathi zwi, unganyakazi lakancinyane.”
Iyagcizelela imbongi ukuthi nxa sekunje lowo mfowabo uyabe elele emhlabathini womhlaba, embethe ingubo eluthuli. Iyasitshengisa njalo ithuna lesiNtwini ukuba kalifani laleli elemadolobheni eligqitshelwa ngenhlabathi lisale linjalo. Leli elemakhaya lifakwa amatshe phezulu, yikho nje imbongi isithi lo osefile wembeswe ngengubo eluthuli njalo unyathezelwe ngamatshe. Ukunyathezelwa ngamatshe lokhu imbongi ithi kungathi lo osedlule uthe uzavuka abaleke uma kungenziwanga njalo.
Nxa ekhangela ethuneni lomfowabo lowo ziyahlengezela izinyembezi ngoba izulu limnetha limnethe, lelanga lalo limtshisa limtshise. Umqando lawo uzenzela okwawo esethuneni lelo. Amazolo lawo ayamkhithikela, kanti lomnyama lawo ebusuku uthi bhe kulelothuna. Zonke lezi zinto ziletha ubuhlungu kumfowabo lo okhangeleyo osaphilayo. Ngenye indlela kumbongi umfowabo lo kafanga, uyaphila yikho esizwa ubuhlungu ngemvelo eyenzakala engcwabeni lomfowabo.
Lanxa kunjalo imbongi ikhuthaza umfowabo ukuthi kalale, aphumule. Kuye kafanga umfowabo ulele ngakho kafuni kumphambanisa kalale aphumule ekuphumuleni okulaphakade emaphethelweni empilo yakhe. Imbongi ithi kusemaphethelweni ohambo ngoba impilo bayifanisa lohambo olusuka kwenye indawo luye kwenye.
Ubesephile impilo ende lumuntu ngoba imbongi ithi usefike emaphethelweni ohambo okwakukade kwasa eluhamba lapha emhlabeni.
