uMthunywa
YiNtatheli kaMthunywa
KULESIKHULU sezemfundo esigabeni seTsholotsho esidlisa ababalisi bakule indawo imbuya ngoluthi nanko phela kubikwa sihlambaza sihlukumeze ababalisi phambi kwabafundi.
Kusolwa ukuthi isiphatho sesikhulu lesi sezemfundo eTsholotsho sibangele ukuthi ababalisi babambane babe yimbumba babhale incwadi eqondiswe ehofisini kaMongameli welizwe kanye lakuKhabhinethi becela ukukhululwa kuleli jogwe.
Ababalisi laba baphinde njalo basabalalisa incwadi le kunkundla zokuxhumana zeWhatsApp kumaviki amabili edluleyo osekwenze indaba yesikhulu sezemfundo lesi (igama siligodlile) yaba ngundabamlonyeni.
Ekhuluma loMthunywa omunye umbalisi uveze ukuba isikhulu lesi kabasasifuni eTsholotsho ngenxa yezenzo zaso.
“Kubuhlungu ukweyiswa kanye lokwehliswa isithunzi phambi kwabazali kumbe izethekeli. Uthethiswe njengosane oluzelwe izolo emphakathini kulokuthi nxa kukhona okuphambanisileyo ubizwe ukhuzwe ehofisini.
“Isikhulu lesi sesiphenduke uFaro ngoba usiphethe luklubhu thina sonke siyizisebenzi zikaHulumende.
Kakhethi ukuthi ungumbalisi loba ungumphathi wesikolo, sonke usiphatha angathi singabantwanyana nje,” kutsho umbalisi lo okhulume loMthunywa ongathandanga ukuqanjwa ngebizo ngoba esesabela umsebenzi wakhe.
Kuncwadi esatshalaliswe kunkundla zokuxhumana kusolwa ukuba isikhulu lesi saqedisa omunye umphathisikolo amalanga amahlanu elala esilindweni samabhasi eTsholotsho kodwa yena engakutshayi indiva lokhu. Umphathi lo wayehambise amaphepha emahofisini kwafika kwadingakala izinto ezinengi waqeda insuku elala egcekeni.
Kubikwa njalo abanye abaphathisikolo bathenjiswa ukususwa ezikhundleni.
Omunye njalo umbalisi oxoxisane lentatheli ngesikhulu lesi uthe nxa besemahofisini isikhulu lesi siyabekela batshone belindile ehofisini.
“Isikhulu lesi kasitshengisi ubuntu, sihlala sisethusela ababalisi, abanye ubathembisa ukubaxotshisa umsebenzi ethi kabamlaleli. Kwesinye isikhathi siyafika emahofisini sitshone sihleli ilanga lonke angani uyasikhawuliswa engasincedi aze akwenze ngesikhathi asifunayo,” kubika umbalisi.
Ekhuluma lomphathisikolo wesinye isikolo owale ukuziveza igama lakhe esesabela umsebenzi wakhe uchaze ukuba isikhulu lesi silochuku.
“Mina njengomphathi indlela esiphathwa ngayo asiyithakazeleli, umsebenzi wethu siyawuthanda kakhulu kodwa siyahataniswa njalo siyathethiswa.
“Kwezinye izikhathi siyatshelwa ukuba sizaxotshwa ezikhundleni. Kayisiyo mpilo le ngitsho, sicela uncedo kubakhulu bethu sesidubekile,” kubika umphathisikolo lo.
UMthunywa uzamile ukukhuluma lesikhulu lesi esesithwalise nzima ababalisi kodwa sathi kukhulunywe labakhulu baso andubana siqume ucingo intatheli isakhuluma laso.
“Hamba uyebuza abakhulu bami, angithi nje wonke umuntu ulabakhulu bakhe,” kutsho isikhulu lesi siquma ucingo.
UMthunywa uxhumane loProvincial Education Director weMatabeleland North uMnumzana Jabulani Mpofu ovumileyo ukuba udaba lolu lufikile endlebeni zakhe.
“Mina angilalwazi ngodaba lolu, lami ngibone ngithunyelwa imilayezo kunkundla zokuxhumana. Angithi ohlatshiweyo nguye ofuthelwayo kodwa udaba olunjalo kumele luchwayisiswe sibili,” kutsho uMnu Mpofu.
