uMthunywa
Nkosilathi Sibanda
SELIDIMELA emansumpeni kuqembu leHighlanders elingena kuhlelo lokukhetha umsekeli kamgcinisihlalo lomgciningcebo weqembu ngeSonto.
Kulandela ukumenyezelwa kwalolukhetho, akhona amalunga uqobo asephumele egcekeni ethembisa ukuthi azaletha utshintsho kuthimu yezwe lonke.
Abalandeli baleliqembu abavunyelwa ukuvota babikele iphephandaba likazulu ukuba sebefuna inkokheli ezintsha.
Kulabo abafuna ukuvotelwa abangakaze bephathe izikhundla nguLongwe Ndlovu ofuna ukuba ngumsekeli kamgcinisihlalo. UNdlovu, ongusomabhozimusi wodumo kuleli, uzancintisana loModern Ngwenya.
Kuliviki uMthunywa uxozwe kabanzi loNdlovu esenzikini yakoBulawayo ngesikhathi ephawula uluhlu lwakhe lokukhankasa.
UNdlovu ungomunye wabasekeli beHighlanders abasiza ithimu nxa yehlelwe ludubo nanko phela ukhiphe inkomo esibayeni ezadliwa ngabadlali labaqeqetshi nxa besenkambeni yokulolonga.
Inengi labasekeli bebhola lenyawo bazakhumbula ukuthi uLongwe nguye owadingela iqembu abadlali abafika benza untshintshi eqenjini. Umdlali uRoderick Mutuma wangemunye wabadlali laba abagcinwa, baholiswa nguNdlovu ngesikhathi bekuBosso.
Ngaphandle kwalokhu, uNdlovu waziwa njengo ‘mntwana’ weHighlanders ngoba ubika ukuba ukhulele ngaphansi kweqembu.
Ekhuluma ngenhloso yakhe yokufuna isihlalo sokuba ngumgcinisihlalo, uNdlovu uthe ukuzafuna ukuthi iqembu liqede izikwelede zayo. Lihuge abadlali abalethalenta lokuthi lithole usekelo olukhulu mihla yonke.
Uthe umkhankaso wakhe ugxile ekubumbeni inhlelo zeBosso ukuthi ziguqule iqembu ukuze likhokhelwe njengebhizimusi elilenzuzo.
“IHighlanders liqembu engakhula ngapahnsi kwalo ngakho ngizizwa ngilenhloso yokuthi ngiphathise ekuthini inhlelo zayo ziphakame. Akumelanga thina abalandeli bayo siyekele isiwa, endaweni yokuthi siphathise ngalokho esilakho. Ibhola libhizimusi, leHighlangers ayiqale ukukhokhelwa njengebhizimusi. Mina ngilakho ukuphakamisa lelobhizimusi.
“Ngililunga elaziwa ngokusiza ithimu nxa kukhona okuthile okufunekayo. Okwamanje ngivule isibaya sama ngakhipha inkomo esidliwa ngabadlali. Ngithengele iqembu amanzi abazawanatha belungiselela iligi ezayo. Lokho ngokuncinyane ngoba kuminyaka edluleyo kunengi esengikwenzele iqembu.
“Konke lokhu ngakwenza ngothando, hatshi ngoba ngifuna amavoti. Amalunga ethu kumele avotele mina ngenxa yokuthi ngilamacebo okuyiphakamisa iBosso njengethimu njalo njengenhlanganiso ebalulekileyo empilweni zalabo abathanda inguqu kwelakithi,” kutsho uNdlovu.
UNdlovu, ophinda abelebhizumusi lokulima, uthe nxa esengenile esihlalweni uzavuselela ubudlelwano lamankampani.
“Akhona amankampani azwayo afuna ukusondelela iHighlanders. Mina ngilobudlelwano okubukhulu labantu abangenelisa ukuthi bancedisane leqembu. Lokhu kuzenza kubelula ukuthi sehlise isikwelede,”kutsho uNdlovu ongubabomncane kaMthembe Ndlovu owake wabangumqeqetshi weHighlanders.
Usomabhizimusi lo uthe ulethemba lokuthi uzanqoba, abizwe njengomsekeli kamgcinisihlalo ngoba akula omunye ongawenza lumsebenzi ngcono.
“Amalunga ethu azavota ngoMgqibelo ngicela afaka ithemba kimi. Izenzo kungemazwi. Imsebenzi yami eqenjini iyazikhulumela,” nguNdlovu lo.
