uMthunywa
YiNtatheli kaMthunywa
UKUDLALWA kwehlandla lama-semi-final enkezo ye-Easycall enkundleni yeBarbourfields sekunike ukaputeni weHighlanders uFelix Chindungwe isibindi sokuthi akhulume ngokungesabi ukuthi nguye umdlali ozathwala inkezo le.
UChindungwe uthe kuzayangisa ukuthi isizini iphele iBosso ingelankezo ebiza imali njengeye- Easycall.
Inkezo le isekelwa yinkampani yeNetOne.
Umdlali lo, otshibilika eyimvimbi ukhulume lephephandaba likazulu ngoLwesibili ngesikhathi kukhitshwa umbiko wokuthi iHighlanders izangqikilana leDynamos eBarbourfields mhlaka 5 kuMpalakazi.
IBosso yenelisa ukunqoba iDynamos kunkezo yamasotsha phakathi komnyaka kodwa ukudibana kunkezo ye-Easycall kubonakala kungumdlalo omkhulu.
Sekuleminyaka elitshumi iHighlanders yacina ukunqoba iDynamos kumkhankaso waphezulu kanye lakumidlalo yenkezo ezincintiswa ngamathimu amanengi.
Lokhu akutsho lutho kuChindungwe, othe imbali yokuphumelela kweDynamos phezulu kwabo ayibathinti lakancane.
“Ngizibona ngiyithwala inkezo ye-Easycall. IHighlanders izanqoba, ngikubona kunjalo lokhu ngoba yisifiso sami ukuthi iqembu lithole inkezo le, njengoba siyehlulekile kuligi.
“Ukudlala leDynamos yikho esikufunayo ukwenzela ukuthi sibonise abalandeli bethu ukuthi siyayibhuqa ithimu le. Inkulumo zokuthi iDynamos iyasehlula ngeyakudala. Sasingekho kuHighlanders ngesikhathi idliwe yiDynamos.
Sekulabadlali abatsha labaqeqetshi abafuna ukwenza imbali,” kubika uChindungwe.
IHighlanders isinqobe imidlalo emithathu ilandelana kumaviki anabili adluleyo. ITshilamoya ikhiphe iFC Platinum kunkezo yeNetOne ngokuyonqoba 1-0, yasuka lapho yabhuqa iHwange 4-2 kumdlalo weligi. NgeSonto itshaye iTsholotsho 2-1.
Ngokutsho kukaChindungwe, iBosso izaqhubeka ihuba ngomdladla ofanayo.
“Isizini izaphela sinqoba kokuphela. Lalapho sesigqiba ngemidlalo ye-Easycall kuzafana.”
Sebengene batshintshana abaqeqetshi kulithimu kodwa kusehlula ukuthi basondelele inkezo ezizwayo. Lonyaka abasekeli balo bazathemba ukuthi ithimu le ibise injabulo ngokuthwala yona inkezo eseleyo.
Umaneja wabaqeqetshi uCosmas Zulu wazise iphephendaba likazulu ukuba uselungise ithimu wayiphenduphendula ukuthi iqedise isizini inqoba.
“IHighlanders yiyo ithimu yokubukela kumidlalo eseleyo kulisizini. Labo abathi abadlali bethu sebediniwe bayasoma. Sengiyilungise yaphelela. Inhloso seyikuyinkezo kuphela.”
UZulu uqinise amazwi kaChindungwe ngokuthi ukhulekela ukunqoba inkezo ye-Easycall.
“Ngilesiqiniseko sokuthi sizanqoba kulinkezo.”
