uMthunywa
Ncekwenhle Ncube
UGOGO oleminyaka engu (57) otshade lejaha elileminyaka engu-23 yokuzalwa uthi kalandaba ukuthi abantu bathini ngaye ngoba yena lomkakhe bazihlalele kuhle njalo olomona kumele ahambe ayokufa.
Indaba ka Sophie Masikuka lomkakhe uWellington Mabhiza ababophe elikasofasilahlane kumaviki amabili edluleyo eSakubva, eMutare itshiye abantu bengelanikani ngesenzo salaba ababili.
Kubikwa ugogo uSophie Masikuka odume ngelithi ‘‘Gogo Saut’’ uzilahle phansi intombi zedolobho leMutare emjahweni wokuzuza ijaha nanko phela enqobe imizwa kaMnu Mabhiza waze watshadwa njengonkosikazi walinsizwa.
Intatheli kaMthunywa ibikelwe ukuthi laba ababili abaqale ukuhlanyisana eminyakeni embili edluleyo bahlanganiswe ngokusemthethweni njengomfazi lendoda emavikini amabili edluleyo.
Ekhuluma lephephandaba uNkosazana Tatenda Ndhlovu uchaze ukuthi kube lihlazo ukubona umtshado phakathi kwejaha elingangoMabhiza logogo uSaut intombi zikhona.
“Akulathando olukhona laphana. Kambe ugogo ongakayana kuthwe uyatshada esitsho esithathela ontanga bethu thina sithathwe ngobani? Kanti amaxhegu alingana laye kawaboni? Vele ngabe kuyangami ngabe umthetho uyaqiniswa kudilizwe izinto ezinjengalezo.
“Engxenye umntanabantu udlisiswe. Ngeke uyale intombi yakho enhle esaselalo ithumbu uyekhetha umagogo ongasela kukuzalela abantwana. Lihlazo lelo” kutsho uNkszn Ndhlovu
Ugogo uSaut ubikele iphephandaba ukuthi uthando luyajuluka njalo impilo imnandi phakathi kwakhe lomnyeni wakhe njengoba besanda kutshada.
“Siyakholisa lomyeni wami. Akulanto esihluphayo nxa ngilaye ngizwa igazi ligijima ngomzimba wonke. Ngiyamthanda futhi laye uyangithanda.
“Asilandaba lokuthi abantu bathini okuqakathekileyo yikuthi mina lomkami siyathandana. Khona ngelanga lomtshado wethu ngabe abantu bambonile ukuthi ubegqokeni. Ubecwebezela ngamthengela yonke into” kuchaza ugogo Saut.
Ugogo Saut ubuye wachaza ukuthi yena lesithandwa sakhe badla ukudla okuphezulu okwe$15 ngelanga.
Intatheli ibuye yaxhumana loMnumzana Mabhiza yena ochaze ukuthi uthando lwabo luvutha amalangabi njalo ngeke ehlukane lesithandwa sakhe lesi asikhethelwe yinjuzi yakhe.
“Mina ngisebenza ngamandla enjuzi. Kungakho injuzi yami iyangitshela ukuthi ngithathe bani. Ngikhuluma nje uNkosikazi wami uSaut ngamlayelwa ngisebenzela eGoli ukuthi ngiyemqomisa ngitshade abe ngumfazi wami.
“Angilandaba ukuthi abantu bathini kuphela nje nxa injuzi yami ijabulile konke kuhle kimi”
Kubikwa emtshadweni kaMabhiza loSaut abantu babeyinhlabathi abanye bezohalalisela kanti njalo abanye bezozibonela ngamehlo abo ugogo etshada “lomntanakhe”.
