uMthunywa
YiNtatheli kaMthunywa
UKENNETH Mhlophe weHighlanders uthe uzizwe ejabula ukuba ngumkhokheli kumnyaka wakhe wakuqala engumgcinisihlalo waleliqembu.
UMhlophe osethandwe linengi labasekeli beBosso ngokuzehlisa kwakhe, uthethe isikhathi sokuthi akhulumisane labantu, ebafisela ikhefu elihle.
Ekhuluma loMthunywa andubana ayekuthi gwaqa laye akholise ikhefu leKhisimusi, uMhlophe ubike ukuba isizini ka2018 iphethe kuhle leqembu litshengisele ukuthi seliqinile.
Uthe okumjabulisa kakhulu yikubona ithimu, iqula labakhokheli, labasekeli bayo bebambene.
“Ngiyajabula ngokuba ngumgcinisihlalo weqembu leHighlanders. Iqembu libunjwe kuhle, kulabadlali abasakhulayo abaphethe isizini beqinile, kulethemba lokuthi ngomnyaka ozayo bazadlala inguqu kuzwa.”
UMhlophe ungene lasebulenjini, ekhasini likaTwitter, wabika ukuthi ufisela yonke imuli yeHighlanders umnyaka omutsha omuhle.
“Ngithanda ukufisela ibhodi, iqula labakhokheli, abaqeqetshi, abadlali labasekeli umnyaka omutsha omuhle. Izenzo kungemazwi. Bekukuhle ukusebenza lani ngomnyaka wami wakuqala ngingumgcinisihlalo . . . ,” kutsho uMhlophe.
Umgcinisihlalo lo ubeka amazwi la ngesikhathi iqembu lakhe lifulathelwa ngabadlali uGabriel Nyoni loPeter Muduhwa.
Ukuhamba kwabadlali laba kuzavulela abanye abadlali amathuba.
UMhlophe ukhulume ngobudlelwano obuhle phakathi kweHighlanders lenkampani yeNetOne.
Uthe ukubambana kwabo leNetOne kwaletha inguquko enkulu.
“Ukuba khona kweNetOne kwabayisibonelo sokuba iHighlanders yenza kahle kunguqu njalo iliqembu amankampani afuna ukusebenzelana lalo. Siliqembu elaziwa ngokuqhuba inhlelo zayo ngobunono, ngakho nxa inkampani enjenge-NetOne isisekela, kutsho ukuba senza kahle.
“Kubalandeli bethu usekelo lwabo aluqhubekele phambili ngo2019. Nxa abasekeli bethu kwezemali bebona ukubambana kwabalandeli, kuzenza kube lula ukuthi bahlale belathi,” kutsho uMhlophe.
Kulisizini uMhlophe uzehlise kubalandeli beBosso ngokubavakatshela izwe lonke. Ubike ukuba wagcwalisisa isithembiso asenza mhla edinga amavoti okukhokhela iqembu.
